У Пецярбургу з-за візіту Пуціна адключылі мабільны інтэрнэт

• 26.07.2026, 17:37

Страх відавочны.

У Санкт-Пецярбургу пасля прыезду прэзідэнта Расіі Уладзіміра Пуціна на Дзень ваенна-марскога флоту адключылі мабільны інтэрнэт. Паводле дадзеных Downdetector, колькасць скаргаў на адсутнасць доступу да Сеціва пачала расці з 13:00 па Мінску. Жыхары паведамляюць пра немагчымасць адкрыць сайты і прыкладанні па-за «белым спісам», зацверджаным уладамі. Колькасць зваротаў набліжаецца да 1000, заўважыла The Moscow Times.

Пры гэтым ніякіх папярэджанняў пра атаку беспілотнікаў на горад у нядзелю не было. З 08:00 да 11:00 па Мінску ўлады таксама перакрывалі рух па Адміралцейскай набярэжнай і Сенатскай плошчы.

Пуцін традыцыйна наведаў Адміралцейства, дзе яго сустрэлі ганаровы каравул, міністр абароны Андрэй Бялоусаў і старшыня Марскай калегіі Мікалай Патрушаў. Акрамя таго, прэзідэнт пагутарыў з галоўнакамандуючым ВМФ адміралам Аляксандрам Маісеевым. Сёлета расійскаму ваенна-марскаму флоту споўнілася 330 гадоў.

Пры гэтым карэспандэнт «Бумагі» перадае, што атмасфера ў цэнтры горада не надта святочная: маракі ходзяць па Дварцовай плошчы і скардзяцца, што на вуліцы мала людзей. Ваенна-марскі парад і салют сёлета зноў адмянілі з меркаванняў бяспекі з-за пагрозы атак украінскіх беспілотнікаў. Аналагічнае рашэнне ўлады прынялі год таму — упершыню пасля адраджэння параду ў 2017 годзе паводле ўказу Пуціна.

У бягучую праграму Дня ВМФ у Пецярбургу ўвайшлі толькі культурныя і памятныя мерапрыемствы, уключаючы ўскладанне кветак да помнікаў Пятру I і адміралу Фёдару Ушакову, а таксама адкрыццё бюста адміралу Паўлу Нахімаву.

Прэс-сакратар прэзідэнта Дзмітрый Пяскоў раней паведаміў, што Пуцін у Пецярбургу паглядзіць вучэнні ВМФ, заслухаэ даклады вайскоўцаў і наведае Санкт-Пецярбургскі дзяржаўны марскі тэхнічны ўніверсітэт.