Пуцін страціў дар мовы
- 27.07.2026, 11:56
Такаеў перадаў «прывітанне» ад паважаных людзей.
У суботу прэзідэнт Казахстана Касым-Жомарт Такаеў на сустрэчы з Пуціным у Амску сказаў, што вайну ва Украіне пара спыняць. Пуцін да гэтага часу не знайшоў, што сказаць у адказ. Хаця за мінулыя два дні нагоды і магчымасці ў яго былі. Але гэта не дзіўна. Калі здараюцца сапраўды вялікія непрыемнасці, Пуцін заўсёды сыходзіць у глухую несвядомасць, піша planbmedia.io.
Найбольш крыўднае, што заяву пра неабходнасць спынення вайны Такаеў зрабіў не проста публічна. Ён яе зрабіў, знаходзячыся на тэрыторыі Расіі. Падчас казахстанска-расійскага форуму рэгіёнаў у Амску. Прычым адразу ўдакладніў, што стараецца не толькі для сябе.
«Да мяне паступае шмат сігналаў, з Еўропы, з Злучаных Штатаў Амерыкі… Прырода гэтага канфлікту не зусім зразумелая для многіх, у тым ліку і для нас… Людзі ведаюць, што я збіраўся, планаваў быць у Амску, ведаюць пра нашу сустрэчу, прасілі перадаць, як выйсці з сітуацыі, — сказаў Такаеў. — Магчыма, гэты канфлікт ужо варта замарозіць».
То-бок, хлопцы цікавяцца. Хлопцам усё гэта не даспадобы. Хлопцы прасілі перадаць, што пара завязваць. Пакуль яшчэ з усёй павагай. Пуцін у адказ паабяцаў праінфармаваць Такаева пра ход і перадумовы ў прыватнай форме.
Замест Пуціна публічна адказаў яго прэс-сакратар Дзмітрый Пяскоў. Ён сказаў, што замарозка канфлікту да капітуляцыі Украіны немагчымая. А тыя, хто гэта прапануе, проста насамрэч не ў курсе.
«Значыць, мы недастаткова эфектыўна распавядалі пра першапрычыны. Мы працягнем гэта рабіць з падвоенай энергіяй», — сказаў Пяскоў.
То-бок, хлопцаў, якія цікавяцца, Пуцін паслаў да печанегаў. Але зрабіў гэта праз свайго прэс-сакратара. У яго самога, прынамсі публічна, патрэбных слоў не знайшлося. І што характэрна, ужо не ўпершыню.
Пра наступ Украіны ў Курскай вобласці Пуцін маўчаў 36 гадзін. Пра пажар у ТЦ «Вішня» ў 2018 годзе, у якім загінулі 60 чалавек, ён выказаўся толькі праз 40 гадзін. Пра захоп школы ў Беслане ў 2004 годзе замест Пуціна таксама гаварыла яго прэс-служба. Ён сам выступіў з публічнай заявай толькі пасля штурму, падчас якога загінула больш за 300 чалавек. Ну, а даўжэй за ўсё Пуцін шукаў патрэбныя словы падчас катастрофы з падводнай лодкай «Курск». Тады словы знайшліся толькі праз чатыры дні, калі лодка ўжо даўно «патанула».
Увогуле, Пуцін страчвае дар мовы кожны раз, калі з ім здараюцца сапраўды вялікія непрыемнасці. Таму прывітанне, якое Такаеў перадаў ад паважаных людзей, для Пуціна па адчуваннях супастаўляльнае з украінскім наступам у Курскай вобласці. Калі свет раптам так перакульваецца, што нават не ведаеш, што і сказаць.