Беларусам абяцаюць больш карысную аўсянку

• 28.07.2026, 19:48

Вывелі новы гатунак.

У Беларусі вывелі гатунак аўса, які павінен гарантаваць максімальна карысны і смачны сняданак, паведамілі ў Мінсельгасхарчы.

Новы гатунак высокаінтэнсіўнага яравога аўса «Мэтр» ужо ўключылі ў Дзяржаўны рэестр, галоўная асаблівасць навінкі — ён кароткасцябловы і вырастае не вышэй за метр.

«Такі авёс мае высокую ўстойлівасць да палягання: ён не кладзецца на зямлю ад моцнага ветру або зліўных дажджоў, што гарантуе захаванасць ураджаю і зручнасць яго ўборкі камбайнамі», — расказалі ў міністэрстве.

Таксама гатунак устойлівы да хвароб лісця: яно не схільнае да тыповых захворванняў, і аграрыям не даводзіцца злоўжываць хімічнай аховай, робячы канчатковы прадукт больш экалагічным.

«Зерне «Мэтра» вылучаецца павышаным утрыманнем бялку (да 14,4%) і высокай алейнасцю (да 5,1%). Для жывёлагадоўлі гэта азначае больш пажыўны рацыён і, як вынік, высокія надоі малака і прывагі. Для чалавека ж гэта гарантыя максімальна карыснага, смачнага і насычанага нутрыентамі сняданку», — заявілі ў ведамстве.

У 2025 годзе пад авёс у Беларусі было аддадзена амаль 150 тысяч гектараў зямлі, амаль усё засеялі айчынным насеннем. Штогод краіна вытварае сотні тысяч тон гэтага збожжа: частка ідзе на выраб знаёмай усім аўсянай крупы, а значная доля забяспечвае якасным кормам жывёлагадоўчыя фермы.