Лукашэнку стала кепска на «дзень незалежнасці»?

• 3.07.2026, 15:42

Замест дыктатара выступаў Вольфовіч.

Урачыстыя мерапрыемствы, прысвечаныя «дню незалежнасці», у мемарыяльным комплексе «Курган Славы» сёлета прайшлі без удзелу Аляксандра Лукашэнкі. Пра гэта сведчаць кадры прамой трансляцыі, якую вёў з месца падзеі дзяржаўны тэлеканал «Першы інфармацыйны».

У цырымоніі ўзялі ўдзел чыноўнікі: прэм'ер-міністр Аляксандр Турчын, дзяржсакратар Савета бяспекі Аляксандр Вольфовіч, кіраўнік Адміністрацыі Лукашэнкі Дзмітрый Круты, кіраўнік Нацбанка Раман Галоўчанка, старшыня «савета рэспублікі нацыянальнага сходу» Наталля Качанава і іншыя.

Удзельнікі ўрачыстага мерапрыемства ўсклалі кветкі да мемарыяла. Вянок ад Аляксандра Лукашэнкі прынеслі вайскоўцы роты ганаровай варты.

Затым перад прысутнымі выступіў Аляксандр Вольфовіч.

— Дазвольце выканаць даручэнне Лукашэнкі, які сёння вырашае задачы стратэгічнага характару ў імя росквіту нашай краіны, павіншаваць усіх прысутных і ўвесь беларускі народ з «днём незалежнасці» Рэспублікі Беларусь.

Дзяржсакратар Савета бяспекі ў сваёй прамове нагадаў пра барацьбу беларусаў за вызваленне ад нямецка-фашысцкіх захопнікаў, заклікаў ушанаваць палеглых хвілінай маўчання, а таксама адзначыў, што будучыня Беларусі — гэта моладзь, якая прыйшла 3 ліпеня на Курган Славы.

Ён падкрэсліў, што «міжнародная абстаноўка напружаная да мяжы».

— Вы бачыце, што адбываецца каля нашых межаў. Нягледзячы на гэта, мы кантралюем сітуацыю. Краіна пад надзейнай абаронай сілавога блоку. Разам з тым незалежнасць патрабуе адзінства і агульнай адказнасці за лёс нашай дзяржавы, — заключыў Вольфовіч, заклікаўшы берагчы мір, сям'ю і краіну.

У цырымоніі ўскладання вянка і кветак на Кургане Славы 3 ліпеня Аляксандр Лукашэнка прымаў удзел як мінімум у 2025, 2023, 2022, 2021 гадах. У 2024 годзе Аляксандр Лукашэнка спачатку выступіў 2 ліпеня на ўрачыстым сходзе, прысвечаным Дню незалежнасці, а наступным днём — трымаў прамову на ваенным парадзе да 80-годдзя вызвалення Беларусі.