На Марсе знайшлі яшчэ адны загадкавыя дзверы

• 3.07.2026, 18:10

Марсаход Curiosity зрабіў здымак у кратары Гейла.

Панараму з незвычайным аб'ектам зрабіў марсаход Curiosity мінулага месяца ўнутры кратэра Гейла. Як вядома, гэта ўдарны кратар, чыя шырыня складае 154 км; менавіта там працуе марсаход Curiosity з моманту яго пасадкі на Чырвоную планету ў 2012 годзе, піша Daily Mail.

Сярод пыльнага ландшафту на здымку некаторыя карыстальнікі ўбачылі незвычайную структуру ўдалечыні. На іх думку, аб'ект нагадвае прыземісты, круглы дом з дзвярным праёмам, які нагадвае старажытныя жытлы людзей на Зямлі.

Шаленую тэорыю вылучыў вядомы паляўнічы на іншапланецян Скот Уорынг, які сцвярджае, што на здымку «дом з глінабітнай тынкоўкі».

«Тое, што выглядае як звычайныя валуны, насамрэч з'яўляецца глінянымі сценамі і дзвярыма, якія стварылі разумныя істоты для абароны ад стыхіі. Яны былі даўным-даўно на Зямлі, яны ж былі і на Марсе», — піша Уорынг.

NASA пакуль ніяк не пракаментавала здымак з Чырвонай планеты, але раней агенцтва тлумачыла падобныя фатаграфіі з Марса. У 2022 годзе марсаход Curiosity сфатаграфаваў на Марсе нешта падобнае да дзвярэй.

«На гары Шарп знаходзіцца цэлы шэраг прыродных трэшчын, у тым ліку адна вышынёй каля 30 сантыметраў і шырынёй 40 сантыметраў — памерам, як сабачая дзверка. Такія трэшчыны распаўсюджаныя ў пародах як на Зямлі, так і на Марсе», — гаварылася ў заяве NASA.

У NASA таксама нагадваюць, што пакуль няма доказаў існавання пазазямнога жыцця; таксама не выяўлена ніякіх слядоў жыцця на Марсе — ні ў мінулым, ні ў сучаснасці.

Марсаход Curiosity — гэта робат памерам з аўтамабіль, які працуе на ядзерным паліве і шукае прыкметы жыцця на Марсе; таксама ён займаецца вывучэннем унікальнага асяроддзя на Чырвонай планеце.