Чарга цыклонаў пранясецца праз Беларусь
- 3.07.2026, 20:36
Гэта адаб'ецца на надвор'і.
У Telegram-каналах Nadvorie і «Метеовайб» распавялі пра надвор'е на бліжэйшы тыдзень у Беларусі. Чакаецца летняя прахалода з дажджамі і ветрам — іх прынясе чарга цыклонаў. Але бліжэй да выхадных сітуацыя можа змяніцца.
Пераважную частку тыдня з 6 ліпеня на метэакарціну ў Беларусі будзе ўплываць вышынная цыкланічная лагчына. Паўночна-заходнія плыні ўстановяць неўстойлівае і нежаркае надвор'е з кароткачасовымі дажджамі, у некаторыя дні — з парывістым ветрам, піша «Метеовайб».
Ансамблевы прагноз Еўрапейскага цэнтра сярэднетэрміновых прагнозаў надвор'я (ECMWF) абяцае ў краіне тэмпературу на 1–3°C ніжэй за норму. Слупкі тэрмометраў будуць паказваць каля +20°C.
Telegram-канал Nadvorie паведамляе, што паўночна-заходні перанос паветраных мас у Беларусі ўсталюецца з 3 да 8 ліпеня. Праз Скандынавію на еўрапейскую тэрыторыю Расіі (ЕТР) адзін за адным пойдуць цыклоны — наша рэспубліка будзе знаходзіцца ў іх прахалодных тылавых частках.
Лакальна разам з дажджамі прайдуць навальніцы, а перыяды без ападкаў будуць кароткімі. Адным словам, у Беларусі будзе сыра.
Акрамя таго, паводле інфармацыі канала Nadvorie, прагнозы лікавых мадэляў сведчаць пра фарміраванне адсечанага вышыннага цыклона ў першай дэкадзе ліпеня. «Гэты цыклон можа сур'ёзна сапсаваць нам у Беларусі пагодку», — папярэдзілі спецыялісты.
Прагноз Белгідрамета: навальніцы і +26°C максімум
Белгідрамет у сваю чаргу ў перыяд з 6 да 8 ліпеня ўключна прагназуе начныя тэмпературы на ўзроўні +7..+15°C. Удзень у панядзелак, 6 ліпеня, паветра ў краіне прагрэецца да +18..+23°C.
А дзённы максімум у першай палове будучага тыдня дзяржаўныя сіноптыкі чакаюць у аўторак, 7-га, — месцамі на паўднёвым усходзе +26°C, перадае БелТА.
Моцны парывісты вецер лакальна, кароткачасовыя дажджы, навальніцы месцамі — усё гэта Белгідрамет пацвярджае.
Калі чакаць у Беларусі пацяплення
Але да канца тыдня, як распавёў «Метеовайб», можа ўзрасці ўплыў новага цеплавога купала над Заходняй Еўропай. «Што, верагодна, прывядзе да павышэння тэмпературы», — спрагназавалі спецыялісты.