Паліцыя не спраўляецца: расіяне дзеруцца ў чаргах за бензін
- 4.07.2026, 12:24
Паліўны крызіс набірае абароты.
У Расіі на запраўках пачасціліся бойкі з-за дэфіцыту бензіну і шматгадзінных чаргаў. У сувязі з абвастрэннем сітуацыі мясцовыя ўлады ў асобных рэгіёнах ужо шукаюць альтэрнатыўныя спосабы забеспячэння парадку на АЗС, піша OBOZ.UA.
Пра гэта паведамляе адно з расійскіх СМІ. Выданне распавяло, што адбываецца ў розных рэгіёнах краіны-агрэсара на фоне паліўнага крызісу.
Паводле дадзеных СМІ, паліцэйскіх на месцах канфліктаў амаль не відаць. З-за гэтага ў Анапе ўлады сфармавалі спецыяльныя патрулі з казакоў і спартсменаў для дзяжурстваў на аўтазапраўках. Акрамя таго, на запраўках Кубані да дзяжурстваў прыцягнулі прадстаўнікоў «асацыяцыі ветэранаў СВА».
У Іжэўску кіроўца выцягнуў свайго апанента з аўтамабіля проста на тэрыторыі запраўкі і пачаў яго збіваць. У Чувашыі канфлікт узнік пасля таго, як матацыкліст спрабаваў дабрацца да свабоднай заправачнай калонкі, аб’ехаўшы доўгую чаргу.
У Калінінградзе на АЗС адбылася бойка з удзелам трох жанчын. Як сцвярджаюць мясцовыя жыхары ў каментарыях, падобныя канфлікты з-за спроб праскочыць чаргу адбываюцца амаль штодня. Напрыклад, у Чабаксарах мужчына спачатку абражаў жанчыну, потым ударыў па яе аўтамабілі, спрабаваў напасці на яе і адабраў тэлефон, калі яна пачала здымаць тое, што адбываецца. Спыніць агрэсіўнага кіроўцу змагла толькі супрацоўніца АЗС.
У Сераве Свердлоўскай вобласці мужчына не дазволіў жончынам пад’ехаць да калонкі з бензінам АІ-92. З-за гэтага разгарэлася сварка, якая перарасла ў бойку. На відэа відаць, як адна з жанчын атрымлівае ўдар у твар, пасля чаго ў яе пачынаецца крывацёк з носа. Пазней мужчына заявіў, што знаходзіўся ў стане алкагольнага ап’янення і спрабаваў «арганізаваць чаргу».
У Татарстане на запраўцы каля мяжы з Башкірыяй двое кіроўцаў пасварыліся з-за чаргі да бензакалонкі. Слоўны канфлікт хутка перарос у бойку, да якой далучыліся жонка аднаго з мужчын і таварыш другога. Падчас інцыдэнту пацярпеў пенсіянер, які спрабаваў разняць удзельнікаў сутычкі.
У Зеленагорску недалёка ад Санкт-Пецярбурга адзін з кіроўцаў ужыў супраць апанента перцавы балончык проста ў чарзе да заправачнай калонкі. Пацярпелы атрымаў хімічны апёк вачэй, пасля чаго паліцыя ўзбудзіла крымінальную справу па артыкуле аб хуліганстве.
Нагадаем, нягледзячы на тое, што калісьці Расія мела статус «бензакалонкі Еўропы», цяпер ёй самой даводзіцца ў экстраным парадку шукаць пастаўшчыкоў паліва — як для аўтамабіляў, так і для авіяцыі. З-за сістэматычных украінскіх удараў па нафтаперапрацоўчых аб’ектах РФ пачала сакрэтныя аперацыі па марскім імпарце авіяцыйнага керасіну і аўтамабільнага бензіну з краін Азіі.