Авіяцыя ЗСУ знішчыла пункты кіравання акупантаў

• 4.07.2026, 19:58

Перад ударам украінскія дроны спалілі расійскі ЗРК «Бук».

Штодня украінскія абаронцы знішчаюць баявую тэхніку і жывую сілу расійскіх акупантаў. На гэты раз Нацыянальная гвардыя Украіны знішчыла палявы пункт кіравання варожых зенітчыкаў і самахідны ЗРК «Бук».

Кадры баявых дзеянняў публікуе падраздзяленне Нацыянальнай гвардыі Lasar`s Group. Нацгвардзейцы дзейнічалі пры садзейнічанні Паветраных сіл ЗСУ.

Аперацыя, у якой таксама брала ўдзел падраздзяленне «Хартыя», складалася з двух этапаў і праходзіла ў зоне адказнасці 2-га корпуса НГУ. Планаванне і каардынацыю ажыццяўляла Групоўка аб’яднаных сіл разам з аналітыкамі разведкі Lasar’s Group.

«Канчатковай мэтай сталі пункты кіравання расіян, але каб нанесці ўдары па іх, трэба было пракласці шлях для авіяцыі. Гэтым і заняліся «Лазары», – гаворыцца ў паведамленні.

Экіпажам аператараў БПЛА Lasar’s Group удалося знішчыць ЗРК «Бук», які расіяне схавалі ў гаі, выкарыстоўваючы яго для прыкрыцця пунктаў кіравання. Пасля гэтага баявая авіяцыя нанесла авіяўдар па асноўных і рэзервовых пунктах кіравання. Пасля чаго аператары БПЛА 151-й АМБр наносілі ўдары па цэлях.