Трамп: ЗША ў разе неабходнасці зноў адправяць у нябыт сэрп і малат

• 5.07.2026, 16:05

Амерыканскі лідар адзначыў, што ЗША ніколі не стануць камуністычнай краінай.

Амерыканскі лідар Дональд Трамп прыгразіў, што Злучаныя Штаты яшчэ раз «адправяць у нябыт» сэрп і малат, якія з’яўляюцца сімваламі камунізму. Пра гэта піша The New York Times.

«Зоркі і палосы (ЗША — заўв.) ужо адправілі сэрп і малат у нябыт, і мы зробім гэта зноў, калі спатрэбіцца», — сказаў кіраўнік дзяржавы, выступаючы з прамовай з нагоды 250-годдзя Злучаных Штатаў у Вашынгтоне.

Па словах гаспадара Белага дома, апошнім часам камунізм зноў «падняў сваю брыдкую галаву», і адбылося гэта ў саміх ЗША. Трамп падкрэсліў, што камуністычная сістэма з’яўляецца поўнай супрацьлегласцю амерыканскай і параўнаў яе з «пухлінай», ад якой трэба неадкладна пазбавіцца.

Кіраўнік дзяржавы адзначыў, што Злучаныя Штаты ніколі не стануць камуністычнай краінай. Таксама падчас выступлення ён выказаў падзяку «ветэранам вайны з камунізмам», сярод якіх — удзельнікі баявых дзеянняў у В’етнаме і на Карэйскім паўвостраве.