На Вілейскім вадасховішчы ўратавалі двух падлеткаў на сапбордах

• 6.07.2026, 3:53

Хлопцаў ледзь не знесла ветрам.

У суботу, 4 ліпеня, на Вілейскім вадасховішчы супрацоўнікі АСВОД уратавалі двух падлеткаў, якіх на сапбордах ветрам зносіла далёка ад берага.

Інцыдэнт адбыўся падчас адпачынку падлеткаў на вадаёме. Двое хлопцаў каталіся на сапбордах, але ў пэўны момант надвор’е рэзка пагоршылася. Праз моцныя парывы ветру яны не змаглі самастойна вярнуцца, і іх пачало хутка зносіць ад берага.

Сітуацыю своечасова заўважыла дзяжурная змена мясцовай ратавальнай станцыі. Работнікі АСВОД хутка дабраліся да хлопцаў і пераправілі іх на бераг. У ведамстве ўдакладнілі, што ўратаваныя не пацярпелі і дапамога лекараў ім не спатрэбілася.