«Мадзьяр» заявіў пра паражэнне расійскіх танкераў у Азоўскім моры

• 6.07.2026, 15:02

А таксама ЗРК С-400.

Сілы беспілотных сістэм ЗСУ ноччу ў панядзелак, 6 ліпеня, паразілі два расійскія танкеры з бензінам у Азоўскім моры і дзве пускавыя ўстаноўкі зенітна-ракетнага комплексу вялікай далёкасці С-400 «Трыумф» у Бранскай вобласці і ў Крыме, якія атакавалі Украіну.

Пра гэта паведаміў камандуючы СБС Роберт («Мадзьяр») Броўдзі.

Увогуле СБС ноччу нанеслі ўдары па 47 цэлях на тэрыторыі РФ і на акупаваных тэрыторыях Украіны. Сярод іх — два танкеры праекта 15781 «Кайрос» ценявога флоту, што дастаўлялі паліва з Таганрога ў Крым. Кожнае судна перавозіла па 7000 тон бензіну, паведаміў «Мадзьяр».

Акрамя таго, вайскоўцы СБС падчас ракетнай атакі на Украіну знішчылі на агнявой пазіцыі ў Бранскай вобласці і ў Крыме дзве пускавыя ўстаноўкі С-400, з якіх запускаліся балістычныя ракеты па Украіне.

«Мадзьяр» паведаміў аб паражэнні нафтабазы і расійскай РЛС НЕБО-У ў часова акупаванай Керчы ў Крыме.

Сілы спецаперацый ЗСУ са свайго боку паведамілі аб паражэнні дронамі нафтавага танкера класа «Волганефть» у Азоўскім моры.