Reuters: ААЭ рэкордна нарастылі здабычу нафты пасля выхаду з АПЕК

• 6.07.2026, 23:19

Цэны на нафту працягнуць зніжацца.

Аб’ёмы здабычы нафты ААЭ па выніках чэрвеня перавысілі 3,8 млн барэляў у суткі, паведамляе Reuters са спасылкай на крыніцы. Такім чынам, краіна дасягнула сваёй мэты пасля выхаду з АПЕК — адсутнасць абмежаванняў на здабычу дапамагла ёй выйсці на рэкордныя паказчыкі.

Паводле дадзеных Reuters, у чэрвені гэтага года ААЭ прыблізіліся да вынікаў красавіка 2020 года. Нафтавікі ў Эміратах таксама пераўзышлі паказчыкі, дасягнутыя ў апошні месяц перад пачаткам блакавання Армузскага праліву праз эскалацыю ў Іране. У лютым 2026 года ААЭ здабывалі 3,64 млн барэляў у суткі.

ААЭ выйшлі з АПЕК на пачатку мая. Паводле слоў міністра энергетыкі краіны Сухейля аль-Мазруі, рашэнне прынялі з-за закрыцця Армузскага праліву, якое абмяжоўвала экспартныя патокі з Персідскага заліва. Акрамя таго, у краіне палічылі залішнімі квоты АПЕК на здабычу нафты.