ЗША створаць у Еўропе цэнтр тэхабслугоўвання ракет для Patriot

• 8.07.2026, 5:14

Вашынгтон дамовіўся з чатырма еўрапейскімі краінамі.

ЗША дамовіліся аб стварэнні ў Еўропе цэнтра тэхнічнага абслугоўвання ракет PAC-3 для сістэм супрацьпаветранай абароны Patriot. Пра гэта паведаміла прэс-служба кампаніі Lockheed Martin у аўторак, 7 ліпеня.

«Lockheed Martin вітае намер Злучаных Штатаў, Германіі, Нідэрландаў, Польшчы і Швецыі вывучыць магчымасць стварэння спецыялізаванага цэнтра тэхнічнага абслугоўвання ракет PAC-3 у Еўропе. Адпаведнае міжурадавае пагадненне было падпісана сёння падчас Форуму абароннай прамысловасці НАТА», – гаворыцца ў паведамленні.

Цэнтр будзе абслугоўваць краіны НАТА, якія эксплуатуюць ракеты-перахопнікі PAC-3 Missile Segment Enhancement (MSE) і PAC-3 Cost Reduction Initiative (CRI).

Lockheed Martin будзе забяспечваць тэхнічную падтрымку, а таксама садзейнічанне ў інжынерным забеспячэнні і кіраванні ланцужкамі паставак.

Пра заключэнне пагаднення паведаміў таксама віцэ-прэм’ер-міністр, міністр абароны Польшчы Уладзіслаў Косіняк-Камыш.

Ён адзначыў, што новы сэрвісны цэнтр павінен паскорыць вяртанне ракет у баявую гатоўнасць.