СБУ нанесла ўдар па расійскай авіябазе Джанкой і порце ў Керчы ў Крыме

• 8.07.2026, 10:12

Украіна ператварае паўвостраў у востраў.

Служба бяспекі Украіны ў ноч на сераду, 8 ліпеня, нанесла ўдары беспілотнікамі па ваеннай авіябазе Джанкой і порце ў Керчы ў часова акупаваным Крыме, паведамляе СБУ.

У Джанкоі былі паражаныя рэтранслятары для расійскіх ударна-разведвальных дронаў «Арыён» і склады са зброяй і ваеннай тэхнікай РФ.

У Керчы, паводле даных СБУ, украінскія дроны нанеслі ўдар па інфраструктуры порта «Крым».

Таксама знішчаны лагістычны хаб з БПЛА, наземнымі рабатызаванымі комплексамі і боепрыпасамі ў раёне Пакроўска Данецкай вобласці. Гэты аб’ект забяспечваў лагістычную падтрымку расійскіх войскаў на гэтым напрамку, адзначае СБУ.

Паражаныя склады боепрыпасаў і гаруча-змазачных матэрыялаў у населеных пунктах Навагрыгораўка і Чырвонае, а таксама пункты пастаяннай дыслакацыі пілотаў БПЛА РФ у населеных пунктах Камыш-Зоря і Камянка ў Запарожскай вобласці. У Гранітным і Стыле Данецкай вобласці знішчаныя ваенныя склады войскаў РФ, гаворыцца ў паведамленні.