Некалькі банкаў Беларусі ўзмацнілі «санкцыі» ў дачыненні да расійскага рубля

• 8.07.2026, 15:16

У чым справа?

У Беларусі некалькі банкаў абвясцілі, што павялічваюць камісію за залічэнне праз касу на разліковы рахунак наяўных расійскіх рублёў. Прычым гэты збор гэтыя фінустановы, як і многія іншыя, увялі гэтым летам, піша «Зеркало».

«Тэхнабанк» увёў змяненні па камісіі за прыём праз свае касы наяўных расійскіх рублёў ад кліентаў-фізічных асоб на бягучы рахунак. Нагадаем, гэты збор з’явіўся з 19 чэрвеня гэтага года для нерэзідэнтаў Беларусі — 2% ад сумы.

Цяпер жа — з 8 ліпеня — «Тэхнабанк» падняў камісію за гэту паслугу да 15%. Пры гэтым у паведамленні фінустановы не ўдакладняецца, ці павялічылі гэты збор толькі для нерэзідэнтаў Беларусі або для ўсіх кліентаў.

У банку дадалі: «Тарыф не прымяняецца пры папаўненні бягучага рахунку з мэтай далейшага адкрыцця ўкладу ў расійскіх рублях (дзень у дзень)».

«МТБанк» таксама паведаміў, што ўводзіць змяненні па камісіі за такую паслугу — паднімае яе да 15% ад сумы. Але гэта датычыцца толькі нерэзідэнтаў Беларусі і рахункаў, да якіх не прывязаная картка. Нагадаем, гэты банк увёў камісію з 19 чэрвеня, яна складала 2%.

У «МТБанку» ўдакладнілі, што для тых, хто адкрыў рахунак да 7 ліпеня гэтага года ўключна, гэты збор будзе дзейнічаць з 10 жніўня.

Нагадаем, раней стала вядома, што ў Казахстане і Кыргызстане за ўнясенне на рахункі наяўных расійскіх рублёў пачалі браць камісіі, а частка банкаў Арменіі ўвогуле адмовілася прымаць банкноты.