Дыктатар Зімбабвэ падаўжыў свае паўнамоцтвы і адмяніў прамыя выбары

• 8.07.2026, 18:12

83-гадовы Эмерсан Мнангагва хоча заставацца пры ўладзе прынамсі да 2030 года.

83-гадовы дыктатар Зімбабвэ Эмерсан Мнангагва падпісаў закон, які падаўжае яго знаходжанне пры ўладзе да 2030 года, паведамляе Reuters. Дакумент, раней ухвалены абедзвюма палатамі парламента краіны, уступіў у сілу неадкладна.

Акрамя павелічэння тэрміну паўнамоцтваў прэзідэнта з пяці да сямі гадоў, новы закон змяшчае палажэнне аб адмене прамых усеагульных выбараў кіраўніка дзяржавы. Цяпер прэзідэнт будзе прызначацца парламентам краіны.

Чуткі пра тое, што Мнангагва мае намер заставацца пры ўладзе пасля заканчэння другога тэрміну ў 2028 годзе, з’явіліся каля двух гадоў таму. У мінулым годзе партыя прыняла рэзалюцыю аб унясенні паправак у Канстытуцыю, а ў лютым гэтага года гэта прапанова атрымала адабрэнне кабінета міністраў.

Законапраект выклікаў незадаволенасць прадстаўнікоў апазіцыі, якія назвалі яго прыняцце парламентам «канстытуцыйным пераваротам». Паводле слоў аднаго з лідараў апазіцыі, Макомборэро Харузівішэ, законапраект «пазбаўляе грамадзян фундаментальнага права наўпрост выбіраць свайго прэзідэнта».