Пуцін патлумачыў дэфіцыт паліва ў Расіі спробамі Украіны сарваць сезон адпачынкаў

• 8.07.2026, 19:04

Дзіўную заяву дыктатар РФ зрабіў на нарадзе з членамі ўрада.

Кіраўнік Расіі Уладзімір Пуцін назваў часовымі цяжкасці з палівам у краіне. Паводле яго меркавання, дэфіцыт звязаны са спробамі Украіны сарваць сезон адпачынкаў на поўдні Расіі, у тым ліку ў Крыме.

«Гэта рэчы часовага характару, гэта зусім відавочныя рэчы, звязаныя яшчэ і з дзеяннямі па зрыве сезона адпачынкаў, адпачынкаў нашых грамадзян на поўдні краіны, у тым ліку і ў Крыме»,— сказаў Пуцін на нарадзе з членамі ўрада (цытата паводле сайта Крамля).

Кіраўнік дзяржавы даручыў забяспечыць палівам дзяржаўныя органы, у тым ліку сілавыя структуры. «І грамадзяне не павінны адчуваць асаблівай нагрузкі»,— дадаў ён. Паводле слоў дыктатара, праблем з пастаўкамі паліва для расійскага аграпрамысловага комплексу нібыта няма.

Дэфіцыт паліва ўзнік у Расіі ў канцы мая. Расійскія рэгіёны пачалі абмяжоўваць продаж бензіну ў адны рукі або прыпыняць яго свабодны адпуск. Для стабілізацыі сітуацыі на ўнутраным рынку Расія пачне імпартаваць нафтапрадукты, паведаміў віцэ-прэм'ер РФ Аляксандр Новак.