Навроцкі назваў сустрэчу з Зяленскім канструктыўнай

• 9.07.2026, 5:46

Прэзідэнты Польшчы і Украіны правялі сустрэчу ў Анкары.

Прэзідэнт Польшчы Кароль Навроцкі заявіў, што яго перамовы з прэзідэнтам Украіны Уладзімірам Зяленскім прайшлі ў канструктыўнай атмасферы, хоць бакам не ўдалося дасягнуць узаемнага разумення па ўсіх спрэчных пытаннях. Брыфінг трансляваўся на старонцы канцылярыі польскага кіраўніка дзяржавы ў сацсетцы X.

Паводле слоў Навроцкага, сустрэча з украінскім прэзідэнтам працягвалася каля гадзіны і стала важным крокам для падтрымання адкрытага дыялогу паміж двума суседнімі дзяржавамі.

«Я прыйшоў да вас проста са сустрэчы з прэзідэнтам Уладзімірам Зяленскім. Гэтая сустрэча была працяглай, мы дыскутавалі прыкладна гадзіну… Думаю, гэта добрая традыцыя, і гэта неабходна ў адносінах паміж суседзямі», — адзначыў кіраўнік польскай дзяржавы.

Навроцкі нагадаў, што апошнім часам адносіны паміж Варшавай і Кіевам суправаджаліся падвышанай напружанасцю. Пры гэтым ён падкрэсліў, што абедзве краіны захоўваюць адзіную пазіцыю адносна галоўнай пагрозы бяспецы.

Паводле яго слоў, Польшча і Украіна аднолькава ўспрымаюць Расію як асноўную небяспеку, аднак гістарычныя пытанні застаюцца прадметам разыходжанняў. Прэзідэнт Польшчы адзначыў, што бакі не разлічвалі вырашыць іх падчас адной сустрэчы.

«Нам не ўдалося на гэтай сустрэчы вырашыць гістарычныя пытанні. Хаця мы і не пачыналі сустрэчу з надзеяй, што ўсе пытанні ўдасца вырашыць», — адзначыў ён.