Дух Анкары супраць Духа Анкарыджа

• Максім Ялі
• 9.07.2026, 7:36

Чакаем канчатковых вынікаў перамоваў.

Прэзідэнт ЗША Дональд Трамп падчас сустрэчы з прэзідэнтам Украіны Уладзімірам Зяленскім у кулуарах саміту НАТА ў Анкары заявіў, што Злучаныя Штаты гатовыя даць Украіне гарантыі бяспекі, каб «ратаваць жыцці». Адначасова нагадаў, што калі Украіне і Расіі ўдасца заключыць мірнае пагадненне, неабходнасць у прадастаўленні гарантый бяспекі з боку ЗША адпадзе і «не давядзецца закрываць неба».

Акрамя таго, Трамп таксама заявіў, што Злучаныя Штаты могуць даць Украіне права на вытворчасць сістэм Patriot. Па яго словах, амерыканскі бок перадасць украінскаму боку неабходныя тэхналогіі і пакажа, як арганізаваць гэты працэс.

Дональд Трамп адзначыў, што вытворчасць такіх комплексаў з’яўляецца вельмі складанай, аднак выказаў упэўненасць, што ўкраінскія спецыялісты хутка асвояць адпаведныя тэхналогіі.

Гэта заява важная, паколькі, калі Трамп сапраўды дасць Украіне ліцэнзію на вытворчасць ракет для сістэм Patriot, неабходных для процістаяння камбінаваным расійскім атакам з паветра, то гэта ўжо будзе сапраўдная «вуда», а не «рыба».

Вядома, на будаўніцтва самога завода, запуск вытворчасці ракет, яе маштабаванне і гэтак далей спатрэбіцца даволі шмат часу ва ўмовах тэрору з боку Расіі, які працягваецца. Але гэта значна лепш у стратэгічным сэнсе, чым вечна стаяць у чарзе па невялікую партыю ракет. Тым больш ва ўмовах глабальнага дэфіцыту на іх і яшчэ большага попыту.

І, безумоўна, гэта будзе важным аргументам у перамовах з расійскім дыктатарам Уладзіміром Пуціным аб заканчэнні расійскай агрэсіі супраць Украіны.

Таму што пакуль Пуцін будзе лічыць, што ён можа, як у цірэ, расстрэльваць ваенныя і грамадзянскія аб’екты нават у найбольш абароненым сістэмамі СПА і СРА Кіеве, што ён можа забіваць мірных жыхароў дзясяткамі балістычных ракет з мэтай падарваць дух украінцаў да супраціву, застаючыся пры гэтым у ілюзіях пра хуткую перамогу, ён не спыніць гэтую крывавую бійню.

Так што чакаем канчатковых вынікаў перамоваў паміж Трампам і Зяленскім.

Максім Ялі, unian.net