Расстат адрапартаваў пра выбуховы рост коштаў на бензін
- 9.07.2026, 9:30
Цэны растуць пяць тыдняў запар.
Рост цэн на паліва ў Расіі зноў паскорыўся, адрапартаваў у сераду Расстат. За тыдзень з 30 чэрвеня па 6 ліпеня бензін у сярэднім па краіне падаражэў яшчэ на 2,1%, а дызельнае паліва — на 3,4%, піша The Moscow Times.
У сукупнасці за апошнія 5 тыдняў бензін падаражэў на 8,9% — удвая больш, чым за папярэднія 5 месяцаў разам (+4,58%). Гадавы рост цэн на АЗС, паводле ацэнкі Мінэканомразвіцця, дасягнуў 21,9% і абнавіў рэкорд з мая 2010 года.
З пачатку года, паводле Расстата, бензін падаражэў на 13,9% — больш, чым за ўвесь мінулы год (+10,58%). Рост цэн на дызпаліва дасягнуў 10,5% за апошнія пяць тыдняў і 14,7% з пачатку года.
Зонай паліўнага бедства застаецца Крым, дзе, паводле афіцыйнай статыстыкі, сярэднія цэны на АІ-92 дасягнулі 123,53 рубля за літр, а на АІ-95 — 170,59 рубля. Вышэй за 100 рублёў за літр трымаюцца цэнікі на запраўках на ўсе маркі бензіну ў Рэспубліцы Тыва.
Даражэй за 80 рублёў каштуе літр АІ-92 у Магаданскай вобласці, на Камчатцы, у Якуціі, у Цюменскай вобласці, Чачні, Кабардзіна-Балкарыі, Дагестане, Калмыкіі, Валагодскай і Варонежскай вобласцях. Сярэдні кошт АІ-95 падняўся вышэй за 90 рублёў у Калмыкіі, Дагестане, Кабардзіна-Балкарыі, Чачні, Тыве і на Камчатцы.
Сітуацыя на паліўным рынку фарміруе інфляцыйныя рызыкі для расійскай эканомікі, падкрэслівае стратэг «Фінама» Яраслаў Кабакоў: «Любыя збоі з прапановай бензіну здольныя прывесці не толькі да росту транспартных выдаткаў, але і да паскарэння інфляцыі практычна ва ўсіх сектарах».
У чэрвені вытворчасць бензіну ў Расіі абвалілася на 25%, да 850 тысяч барэляў у суткі, паводле ацэнак Energy Intelligence. У ліпені пад удар БПЛА трапіў Омскі НПЗ — апошні з топ-10 найбуйнейшых нафтаперапрацоўчых заводаў, які яшчэ не быў пашкоджаны ў выніку ўкраінскіх атак. З 6 ліпеня завод, найбуйнейшы ў Расіі па магутнасці, спыніў перапрацоўку нафты і рэалізацыю нафтапрадуктаў на біржы. З 2 ліпеня спыніўся НПЗ «Ніжагароднафтааргсінтэз» (НОРСІ), які займае другое месца ў РФ па вытворчасці бензіну.
У чэрвені прыпынялі выпуск Маскоўскі НПЗ «Газпрам нафты», НПЗ «Танэка» «Татнафты», а таксама Куйбышаўскі і Валгаградскі НПЗ.