ЗСУ за ноч паразілі 12 расійскіх танкераў у Азоўскім моры

• 9.07.2026, 12:16

А таксама буксір і сухагруз.

Сілы абароны Украіны ў ноч на чацвер, 9 ліпеня, паразілі 12 танкераў расійскага ценявога флоту, адзін буксір і адзін сухагруз РФ у акваторыі Азоўскага мора. Пра гэта паведамляе Генштаб ЗСУ.

Акупанты выкарыстоўвалі названыя судны, у прыватнасці, для забеспячэння палівам груповак войскаў РФ, а таксама для транспартавання нафты і нафтапрадуктаў у абыход міжнародных санкцый, гаворыцца ў паведамленні.

Сілы абароны таксама нанеслі ўдар па нафтаналіўным тэрмінале «Юг Русі» ў Батайску Растоўскай вобласці, у выніку чаго ўзнік пажар. Паводле даных Генштаба, гэты аб’ект забяспечвае перавалку нафтапрадуктаў для экспарту і выкарыстоўваецца для забеспячэння палівам войскаў РФ на паўднёвым кірунку.

Акрамя таго, паражаны склад боепрыпасаў праціўніка ў раёне Саракіна Луганскай вобласці, дадае Генштаб.

8 ліпеня Сілы беспілотных сістэм ЗСУ паведамлялі аб паразанні дзевяці расійскіх танкераў у Азоўскім моры.