Прапагандыстка Сіманьян узгадала пра прадуктовыя карткі ў РФ

• 9.07.2026, 13:52

А раней казала пра «Кіеў за два дні».

Крамлёўская прапагандыстка Маргарыта Сіманьян падчас тэлеэфіру ўзгадала, што калісьці ў Расіі прадукты харчавання былі па картках, а потым заклікала да цярпення і спакою. Пра гэта піша «Дыялог».

Сіманьян прызнала, што ў Расіі, якая ўварвалася ва Украіну, склалася вельмі цяжкая сітуацыя. У краіне назіраецца вялізны дэфіцыт бензіна і дызельнага паліва. У многіх рэгіёнах паліва няма, а там, дзе яно ёсць, уведзены ліміты.

«Бензіна няма? Ды я яшчэ памятаю, маё пакаленне памятае, як ежа была па картках… У маім горадзе Краснадары ў 1992 годзе былі купоны, мы іх выразалі, хадзілі ў крамы. А я асабіста ў 11–12 гадоў хадзіла з вёдрамі па ваду, а не па Coca-Cola. Прыязджала бочка, і трэба было да яе хадзіць з вёдрамі і бідонамі па ваду... Гэта ж было. Мы ўсё гэта памятаем. Нічога, вытрымалі. І цяпер вытрымаем», — заявіла крамлёўская прапагандыстка.

Сіманьян фактычна абвінаваціла «англічан» у тым, што ў Расіі склалася дрэнная грамадска-эканамічная сітуацыя.

Варта адзначыць, прапагандыстка Сіманьян — аўтарка фразы пра «Кіеў за два дні». Менавіта яна стала аўтаркай гэтага мема ў 2022 годзе.