Сакрэтны план НАТА супраць Расіі
- 9.07.2026, 14:05
Як Захад рыхтуецца да абароны ад расіян.
Паўночнаатлантычны альянс распрацоўвае новы план стрымлівання Расіі — яго асновай павінна стаць сістэма, якая з дапамогай спадарожнікаў, беспілотнікаў, іншых сродкаў разведкі і штучнага інтэлекту будзе ў рэальным часе адсочваць перамяшчэнне расійскіх войскаў. Пра гэта паведамляе Bild са спасылкай на дакументы, што трапілі ў распараджэнне выдання.
У распараджэнні выдання Bild апынуліся службовыя дакументы, якія раскрываюць дэталі маштабнага плана пад кодавай назвай «Eastern Flank Deterrence Initiative» (EFDI) — «Ініцыятыва па стрымліванні на ўсходнім флангу».
Як сцвярджаецца, асновай новай канцэпцыі стане бесперапыннае назіранне за перамяшчэннем войскаў з дапамогай спадарожнікаў, беспілотнікаў і іншых сродкаў разведкі, у тым ліку наземных робатаў. Атрыманую інфармацыю плануецца апрацоўваць з выкарыстаннем штучнага інтэлекту, які будзе аналізаваць сітуацыю і дапамагаць ацэньваць магчымыя дзеянні расійскага камандавання.
Яшчэ адным прынцыповым навовадам стане тое, што ўсе дадзеныя і аналітычныя справаздачы будуць адначасова даступныя ўсім краінам-членам НАТА. Гэта дазволіць ваенному камандаванню Альянсу аператыўна вызначаць, якая менавіта краіна ў канкрэтны момант валодае найлепшымі сродкамі для адбіцця пагрозы — ад сістэм радыёэлектроннай барацьбы і кібераперацый да розных відаў узбраення.
У дакументах ужываецца паняцце Kill Web («сетка паражэння»), якое апісвае інтэграваную сістэму збору разведвальнай інфармацыі і нанясення ўдару. Прынцып яе працы сфармуляваны так: «Убачыць першымі. Прыняць рашэнне першымі. Нанесці ўдар першымі».
У якасці прыкладу разглядаецца сітуацыя, калі беспілотнік выяўляе перамяшчэнне расійскай танкавай калоны ў бок тэрыторыі НАТА. Пасля гэтага інфармацыя з розных крыніц — спадарожнікаў, радараў і іншых датчыкаў — аб’ядноўваецца ў адзіную карціну, што дазваляе хутка выбраць найбольш прыдатны сродак паражэння, напрыклад беспілотнік, артылерыю або рэактыўную сістэму залпавага агню.
Прадстаўнік Арміі ЗША маёр Мэт Блуба (Matt Blubaugh) адзначыў, што новая канцэпцыя не павінна замяніць танкі, артылерыю, баявую авіяцыю або вайскоўцаў. Паводле яго слоў, яе задача — павысіць эфектыўнасць іх выкарыстання, зберагчы баявы патэнцыял і даць камандырам больш часу для прыняцця рашэнняў.
Акрамя «лічбавага стрымлівання», НАТА плануе ўзмацніць тэхнічнае абсталяванне ўсходняга флангу. Паводле даных Bild, канцэпцыя прадугледжвае, што ў выпадку нападу першымі будуць дзейнічаць беспілотныя сістэмы — дроны, безэкіпажныя машыны і наземныя робаты. Іх задача — затрымаць прасоўванне праціўніка і аслабіць яго яшчэ да ўступлення ў бой падраздзяленняў з танкамі, авіяцыяй і асабістым складам.
Як сцвярджае выданне, у НАТА разлічваюць рэалізаваць праект у найбліжэйшы час і лічаць, што такая мадэль дапаможа павысіць эфектыўнасць стрымлівання і знізіць рызыку магчымога нападу на краіны альянсу.