«Якое маніякальнае задавальненне атрымліваюць тыя, хто стварае чэргі на мяжы?»

• 9.07.2026, 17:39

Пытанне да Дзяржпагранкамітэта.

Мінчанка agnessvik правяла на мяжы ў Брэсце 10 гадзін, перш чым змагла выехаць з Беларусі. У стварэнні чэргаў на пераходзе яна абвінаваціла беларускіх пагранічнікаў:

«Я не ведаю, якое маніякальнае задавальненне атрымліваюць тыя, хто спецыяльна на беларускай мяжы стварае чэргі. Заўсёды, калі еду — палякі працуюць дакладна і хутка. Праблема заўсёды ў нас. Прыехалі дзесятымі а 12-й гадзіне дня з боку Брэста. Цяпер прайшло 9,5 гадзіны. Мы стаім ва ўнутраным двары. Двор увесь забіты аўтобусамі. За чатыры гадзіны з двара не выехаў ніводны аўтобус. Судзячы па невялікай колькасці аўто, на Варшаўскім мосце няма затораў. Холадна, шмат людзей з дзецьмі, усе шалёна стомленыя. Навошта так рабіць?»

Пазней, пасля праходжання мяжы, мінчанка напісала, колькі часу яна на гэта патраціла:

«У выніку — 10 гадзін чакання на беларускай мяжы і 2,5 гадзіны — на польскай. Палякі працавалі дакладна і хутка».

Пра вялікія чэргі на памежным пераходзе у Брэсце беларусы пішуць ужо некалькі дзён. Каб прайсці мяжу, у многіх гэта займае да 18 гадзін.