Іран тэрмінова экспартуе нафту пасля пагрозаў Трампа ўвесці блакаду партоў

• 9.07.2026, 21:24

Рух танкераў актывізаваўся.

За апошнія суткі Іран адправіў у мора танкеры з прыблізна 11 млн барэляў нафты на фоне чарговага абвастрэння адносін з ЗША і заяў прэзідэнта Дональда Трампа аб магчымым аднаўленні блакады іранскіх партоў. Пра гэта паведамляе Bloomberg.

Паводле даных сістэм адсочвання суднаў, з іранскіх партоў выйшлі пяць супертанкераў і адзін танкер класа Suezmax. Чатыры судны перадавалі сігналы пра сваё месцазнаходжанне ў Аманскім заліве, а яшчэ адно 9 ліпеня знаходзілася паблізу Армузскага праліву.

Рух танкераў актывізаваўся пасля таго, як амерыканскія вайскоўцы другі раз за два дні нанеслі ўдары па Іране ў адказ на атакі Тэгерана на камерцыйныя судны. Гэта паставіла пад пагрозу крохкую дамоўленасць паміж краінамі аб дзеэскалацыі. З-за росту напружанасці іншыя аператары пачалі пазбягаць рызыкоўных маршрутаў, а рух праз Армузскі праліў практычна спыніўся.

Новая хваля нестабільнасці адбілася на сусветным нафтавым рынку. 9 ліпеня цэны на нафту ў Лондане набліжаліся да 79 долараў за барэль, а за тыдзень яны выраслі амаль на 9%.

Аб’ём у 11 млн барэляў прыблізна адпавядае штотыднёваму экспарту іранскай нафты да поўнамаштабнага абвастрэння. У той жа час пакуль невядома, ці ўдасца Тэгерану знайсці пакупнікоў на гэтыя пастаўкі.

Раней на гэтым тыдні дзясяткі мільёнаў барэляў іранскай нафты засталіся на танкерах пасля таго, як ЗША адмянілі выключэнне з санкцый, якое дазваляла Ірану прадаваць нафту на міжнародным рынку.

Цэны на нафту таксама выраслі пасля абмену ўдарамі паміж Вашынгтонам і Тэгеранам і аднаўлення амерыканскіх абмежаванняў на экспарт іранскай нафты.

8 ліпеня Злучаныя Штаты паведамілі пра ўдары па больш чым 80 цэлях у Іране пасля атак на камерцыйныя судны паблізу Армузскага праліву. У адказ Іран заявіў пра ўдары па амерыканскіх ваенных аб’ектах на Блізкім Усходзе.