Беларус аддаў махлярам 280 тысяч рублёў за «дэкларацыі Мінфіна»
- 10.08.2026, 12:11
Махляры запалохалі мужчыну крымінальнай справай за дзяржаўную здраду.
Беларус страціў амаль 280 тысяч рублёў, паддаўшыся на хітрасці махляроў. Падрабязнасці схемы распавялі ў Следчым камітэце.
Раніцай 21 ліпеня гэтага года 39-гадоваму жыхару Мінскага раёна ў Viber патэлефанавала «супрацоўніца Белпошты». Яна сказала, што на яго прозвішча прыйшоў ліст з падатковай і ўгаварыла прадыктаваць код з SMS-паведамлення, што прыйшло на мабільны тэлефон мужчыны.
Пазней пацярпеламу тэлефанавалі псэўдасупрацоўнікі Нацбанка і Мінсувязі. Яны пераканалі ахвяру, што з яго рахунку перавялі грошы фігуранту, які знаходзіцца ў міжнародным вышуку.
Потым у схему ўступіў «супрацоўнік КДБ». Пад пагрозай вобшуку і крымінальнай справы за дзяржаўную здраду пацярпелага прымусілі напісаць падпіску аб неразгалошванні і супрацоўніцтве. Пасля гэтага махляры пераканалі мужчыну зняць з асабістых рахункаў 22 970 і 12 900 долараў і перадаць іх дзяўчыне-кур’ерцы, якую тэлефонныя суразмоўцы прадставілі як супрацоўніцу інкасацыі.
Акрамя таго, пад выглядам абароны «ад чужых крэдытаў» мужчына аформіў пазыкі на агульную суму 159 560 рублёў. Частку грошай ён перадаў той жа дзяўчыне, а астатнія грошы пакінуў у пакеце каля прыпынку ў Мінскім раёне.
«Пасля кожнай перадачы [грошай] пацярпеламу дасылалі дакументы, аформленыя як дэкларацыі Міністэрства фінансаў. У іх нібыта пацвярджалася законнае паходжанне грошай і іх паступленне на захоўванне ў Нацыянальны банк», — паведамілі ў Следчым камітэце.
Калі сувязь з куратарамі спынілася, пацярпелы ўважлівей вывучыў прысланыя паперы. Звярнуўшы ўвагу на сумнеўную пасаду кіраўніка Нацбанка, ён знайшоў у інтэрнэце звесткі пра падобныя схемы падману і звярнуўся ў міліцыю.
На допыце пацярпелы растлумачыў следчаму, што паверыў псеўдаправаахоўніку, бо той звязваўся з ім па відэасувязі з «службовага кабінета» і ў адзенні з пагонамі, падобным да форменнага абмундзіравання.
Следчыя ўзбудзілі крымінальную справу па ч. 4 арт. 209 (Махлярства, учыненае ў асабліва буйным памеры) Крымінальнага кодэкса.