Пуцін атрымаў дрэнныя навіны з нафтавага фронту

• Віталь Шапран
• 10.08.2026, 12:44

Рэальныя даходы бюджэту РФ ад нафты і газу рэзка ўпалі.

Урад Расійскай Федэрацыі ў уласцівай яму манеры на мінулым тыдні паведаміў пра чарговыя перамогі на эканамічным фронце. Маўляў, за ліпень 2026 года нафтагазавыя даходы расійскага федэральнага бюджэту склалі рэкордныя 934 млрд рублёў, што цэлых на 37% больш, чым у чэрвені. І, здавалася б, вось яна — мара Пуціна. Але, як высветлілася, гэта зноў хлусня.

Справа ў тым, што ў апошні месяц квартала расійскія нафтавыя кампаніі выплачваюць квартальны падатак. За другі квартал ён склаў 396 млрд рублёў. Па сутнасці, гэта рэшткавы эфект ад вайны ў Іране і высокіх цэн на нафту ў красавіку і маі гэтага года. І калі адняць гэты квартальны падатак ад агульнай сумы даходаў, то атрымліваецца, што месячныя даходы федэральнага бюджэту склалі ўсяго 539 млрд рублёў, а гэта ўжо на 21% менш, чым у чэрвені.

Больш таго. Расійскія нафтавікі ў ліпені атрымалі па дэмпферу (механізме згладжвання ваганняў) 113 млрд рублёў, гэта ў 1,86 раза менш, чым у чэрвені. Улічваючы, што выплаты па дэмпферу кампаніі ў асноўным выкарыстоўваюць на рамонт нафтаперапрацоўчых заводаў, а ўдары Украіны не сталі менш моцнымі, расійскі ўрад вырашыў зэканоміць на рамонтах НПЗ, зрабіўшы стаўку на імпарт паліва.

То-бок, калі выключыць дэмпфер і квартальны эфект, атрымаецца, што месячныя нафтагазавыя даходы Расійскай Федэрацыі ў ліпені ўпалі на 35,3%. Нагадаю, пры гэтым яны рапартуюць пра рост на 37%.

Цяпер жнівень. Для расійскага бюджэту ён стане даволі цяжкім месяцам. Квартальнага эфекту ўжо не будзе, як і рэкордных цэн на нафту. А вось неабходнасць у рамонтах НПЗ пасля удараў Сіл абароны Украіны застаецца. Акрамя таго, набліжаецца восень, на якую перанеслі планавыя рамонты НПЗ…

Вядома, расійскі дыктатар Уладзімір Пуцін можа распачаць яшчэ адну вайну на Блізкім Усходзе рукамі КВІР або хусітаў, але ў ліпені гэта не дужа дапамагло.

А ў жніўні за беспакойных хусітаў адначасова ўзяліся арміі Саудаўскай Аравіі і Емена…

Таму перспектывы жніўня ў РФ становяцца ўсё горш: падатковая цана на нафту ў ліпені (па ёй будуць разлічваць даходы бюджэту за жнівень) склала 59,02 долара за барэль. Цана ўпала на 6,3%, і высветлілася, што ў цэлым цэны на сусветным рынку нафты і цэны на расійскую нафту — гэта ўсё ж такі розныя цэны. І ім могуць быць уласцівымі нават супрацьлеглыя тэндэнцыі.

Віталь Шапран, УНІАН