Кіроўца Tesla прыдумаў незвычайнае апраўданне за перавышэнне хуткасці

• 10.08.2026, 16:59

Амерыканец паспрабаваў спісаць парушэнне на аўтапілот.

У амерыканскім горадзе Паркер кіроўца Tesla паспрабаваў пазбегнуць адказнасці за перавышэнне хуткасці, заявіўшы паліцэйскім, што аўтамабілем кіравала сістэма дапамогі кіроўцу. Машыну спынілі пасля таго, як яна рухалася са хуткасцю 64 міль у гадзіну (каля 103 км/г) пры дазволенай хуткасці 45 міль у гадзіну (72 км/г), піша Autoblog (пераклад — сайт Charter97.org).

Замест прызнання парушэння кіроўца заявіў, што самастойна не кантраляваў хуткасць. «Я не кіраваў машынай. У мяне быў уключаны аўтапілот», — перадае выданне яго словы.

Кіроўца таксама запатрабаваў запрасіць начальніка паліцыі, мяркуючы, што выкарыстанне аўтапілота вызваляе яго ад адказнасці. Аднак праваахоўнікі хутка адхілілі такі аргумент.

Паліцыя нагадала, што сістэмы дапамогі кіроўцу, уключаючы адаптыўны круіз-кантроль, утрыманне аўтамабіля ў паласе і функцыі аўтаномнага кіравання, не адмяняюць абавязку чалавека выконваць правілы дарожнага руху.

«Сістэмы дапамогі створаныя, каб дапамагаць кіроўцу, а не замяняць яго», — падкрэсліваюць аўтары.