У Беларусь з Заходняй Еўропы перамяшчаюцца атмасферныя франты

• 10.08.2026, 18:22

Прагноз надвор'я на 11–13 жніўня.

11 жніўня пагодныя ўмовы на тэрыторыі Беларусі будуць вызначаць атмасферныя франты, якія перамяшчаюцца з Заходняй Еўропы, услед за якімі чакаецца паступленне прахалоднай паветранай масы. Уначы воблачна з праясненнямі, удзень пераменная воблачнасць. На большай частцы тэрыторыі пройдуць кароткачасовыя дажджы, месцамі з навальніцамі.

Вецер уначы паўднёвы слабы да ўмеранага, пры навальніцах парывісты, удзень з пераходам на заходні, умераны, у многіх раёнах моцны, парывісты. Тэмпература паветра мінімальная ўначы +11..+17°С, максімальная ўдзень ад +19°С на паўночным захадзе да +29°С на паўднёвым усходзе. Атмасферны ціск уначы істотна не зменіцца, удзень будзе слаба расці, піша pogoda.by.

12–13 жніўня краіна будзе знаходзіцца пад уплывам антыцыклону, цэнтр якога перамесціцца з Паўночнага мора на ўсход Польшчы. Чакаецца пераменная воблачнасць. 12 жніўня пераважна без ападкаў, толькі месцамі на поўначы краіны пройдуць кароткачасовыя дажджы, удзень магчымыя навальніцы. Вецер паўночна-захадні парывісты, у асобных раёнах да моцнага. Тэмпература паветра мінімальная ўначы +6..+13°С, максімальная ўдзень +17..+24°С. 13 жніўня пераважна без ападкаў.

Уначы і раніцай у асобных раёнах слабы туман. Вецер паўночна-захадні, паўночны ўмераны, месцамі на паўночным усходзе парывісты. Тэмпература паветра мінімальная ўначы +4..+10°С, месцамі да +12°С, максімальная ўдзень +18..+25°С.