Украіна паразіла НПЗ «Танэка» ў Татарстане

• 10.08.2026, 20:08

Генштаб ЗСУ пацвердзіў пажар на аб’екце.

У ноч на 10 жніўня Сілы абароны Украіны паразілі нафтаперапрацоўчы завод «Танэка» ў Ніжнекамску Рэспублікі Татарстан РФ. На аб’екце зафіксавалі пажар. Пра гэта паведаміў Генеральны штаб Узброеных Сіл Украіны (ЗСУ).

«У ноч на 10 жніўня 2026 года ў межах зніжэння ваеннага патэнцыялу расійскага агрэсара падраздзяленні Сіл абароны Украіны паразілі нафтаперапрацоўчы завод «Танэка» (Ніжнекамск, Рэспубліка Татарстан, РФ). На аб’екце зафіксаваны пажар», — гаворыцца ў паведамленні.

Акрамя НПЗ, украінскія вайскоўцы паразілі шэраг ваенных аб’ектаў расійскіх акупацыйных войскаў.

«Акрамя таго, паражана рамонтнае падраздзяленне ў Хрустальным Луганскай вобласці. Таксама нашы воіны нанеслі ўдар па складзе матэрыяльна-тэхнічных сродкаў праціўніка ў Наваселідаўцы Данецкай вобласці. Акрамя таго, паражаны палявы артылерыйскі склад у Баёвым Данецкай вобласці», — паведамілі ў Генштабе.

Ступень нанесенай шкоды цяпер удакладняецца.

У Генштабе таксама паведамілі пра наступствы папярэдніх удараў украінскіх вайскоўцаў па аб’ектах расійскай інфраструктуры.

У прыватнасці, у выніку паражэння 8 жніўня НПЗ «Ільскі» ў Краснадарскім краі РФ пацверджана пашкоджанне калоны першаснай перапрацоўкі нафты АВТ-6.

Акрамя таго, пацверджаныя вынікі ўдару па аэрадроме «Гвардзейскае» на часова акупаванай тэрыторыі Крыму, які ўкраінскія сілы нанеслі 3 жніўня.

«У выніку паражэння 3 жніўня 2026 года аэрадрома «Гвардзейскае» на ТОТ украінскага Крыму пацверджана знішчэнне дзевяці гарызантальных рэзервуараў з авіяцыйным палівам і пашкоджанне двух ангараў для авіяцыйнай тэхнікі», — паведамілі ў Генштабе.