ШІ дае больш інфармацыі ветлівым карыстальнікам

• 10.08.2026, 21:04

Пра гэта сведчаць вынікі даследавання.

Ці трэба казаць штучнаму інтэлекту «калі ласка», «дзякуй» і ветліва фармуляваць пытанні? Даследчыкі з Аўстрыі высветлілі, што манера зносін са штучным інтэлектам сапраўды ўплывае на тое, якія адказы ён дае, піша «Еўрапульс».

Для маштабнага эксперыменту вучоныя з Універсітэта Інсбрука змадэлявалі 18 тысяч размоў з трыма моўнымі мадэлямі. Даследчыкі выкарыстоўвалі пяць розных стыляў зносін, уключаючы неветлівы.

Як паказала даследаванне, калі карыстальнік ставіўся да чат-бота як да сапраўднага суразмоўцы, а не да машыны, ён атрымліваў больш карыснай і падрабязнай інфармацыі. Такія карыстальнікі ветліва фармулявалі пытанні, дзякавалі за інфармацыю, а часам — нават выбачаліся перад асістэнтамі, калі да гэтага несправядліва абвінавачвалі іх у памылках.

Калі карыстальнікі звярталіся да ШІ гэтак жа ветліва, як да сапраўднага чалавека, яны атрымлівалі амаль у два разы даўжэйшыя і больш падрабязныя адказы, чым пры вельмі кароткім запыце. Пры гэтым у гэтых адказах было ў паўтара раза больш карысных звестак.

Грубасць, наадварот, прыкметна зніжала эфектыўнасць зносін з ШІ-асістэнтамі. На неветлівыя запыты мадэлі маглі даўжэй шукаць адказ, які, як правіла, быў вельмі лаконічным і ўтрымліваў мала інфармацыі. Акрамя таго, гэтыя звесткі патрабавалі дадатковай праверкі.

Разам з тым даследчыкі высветлілі, што манера размовы з ШІ ўплывае і на колькасць спажыванай энергіі. Доўгія адказы патрабуюць дадатковых вылічальных рэсурсаў — таму звычайная чалавечая ветлівасць у размове з чат-ботам мае свой энергетычны кошт.