У Беларусі знайшлі «копію» швейцарскіх Альпаў

• 10.08.2026, 21:19

Ці чакаюць там турыстаў?

Колькі дзён таму карыстальніца паказала ў Threads неверагодна маляўнічыя кадры, знятыя ў Беларусі. На яе відэароліках — зялёнае поле, статак авечак, а на гарызонце ўзвышаюцца саляныя горы, піша Tochka.by.

Інтэрнэт хутка вынес вердыкт: ну чым не швейцарскія Альпы? Відэа разляцеліся па сацсетках, а каментатары адзін за адным пачалі пытацца каардынат гэтай прыгажосці.

І каардынаты неўзабаве знайшліся. Праўда, разам з гэтым усплыў нечаканы і важны нюанс: ехаць туды як на новую турыстычную славутасць усё ж не варта.

Тыя самыя «інстаграмныя» кадры знятыя каля вёскі Півашы Салігорскага раёна. Тут знаходзіцца прыватная ферма, а эфектным фонам служаць знакамітыя саляныя тэрэконы.

У выхадныя туды ўжо кінуліся паляўнічыя за прыгожымі фота і відэа. Сярод іх аказалася і карыстальніца Threads Марыя. Пасля паездкі дзяўчына вырашыла крыху астудзіць пыл тых, хто хоча ўласнымі вачамі ўбачыць «беларускія Альпы».

«Ведаю, што многіх пакарылі кадры гэтага месца. Таму хачу папярэдзіць усіх, хто паедзе сюды: паблікі вельмі хутка разганяюць навіны дзеля ахопаў, але гэта прыватная ўласнасць, вакол якой поле і агароджа», — напісала яна.

Таксама дзяўчына дадала, што прыгожыя фатаграфіі і відэа — гэта не больш як удалае спалучэнне ракурсу, апрацоўкі і ўдачы.

«Авечкі не гуляюць побач з вамі, гэта жывёлы, якія жывуць у сваім рытме, і фоткацца яны з вамі не будуць, таму, калі паедзеце сюды спецыяльна, вам можа пашанцаваць, а можа і не», — шчыра распавяла Марыя.

А дзяўчына, з якой пачалася ўся гэтая «альпійская ліхаманка», пазней і ўвогуле выдаліла свой пост. Відаць, лішняя рэклама ціхай маленькай ферме аказалася зусім ні да чаго.