У Крыме арыштавалі экс‑дэпутата «Адзінай Расіі»

• 11.08.2026, 13:08

Пасля выяўлення ў ягоным двары трупа школьніцы.

У Крыме ў двары дома былога дэпутата Чайкінскага сельсавета ад «Адзінай Расіі» Валянціна Байды знайшлі цела 12‑гадовай школьніцы, паведаміў 5-tv . Пра знікненне дзяўчынкі заявіў яе бацька, калі яна не вярнулася з велапрагулкі, удакладнілі ў МУС. Падчас пошукаў праваахоўнікі ўстанавілі, што школьніца магла знаходзіцца ў 64‑гадовага Байды, які цяпер займае пасаду дырэктара дома культуры ў вёсцы Чайкіна Джанкойскага раёна. Пры затрыманні ён аказаў супраціў паліцыянтам і пагражаў нанесці сабе шкоду.

Па звестках Следчага камітэта, Байда даў дзяўчынцы бытавы газавы балончык, змесцівам якога яна надыхалася да страты прытомнасці і неўзабаве памерла ад вострага атручвання. Пасля яе смерці экс‑дэпутат, спалохаўшыся пакарання, адцягнуў цела ў двор і пачаў рыць яму, каб схаваць яго. Давесці задуманае да канца ён не паспеў — на месца прыбылі супрацоўнікі паліцыі. СК узбудзіў крымінальную справу аб уцягванні асобы, якая не дасягнула 14 гадоў, у антыграмадскія дзеянні (п. «в» ч. 3 арт. 151 КК, да васьмі гадоў пазбаўлення волі) і аб прычыненні смерці па неасцярожнасці (ч. 1 арт. 109 КК, да двух гадоў пазбаўлення волі). Суд накіраваў Байду ў СІЗА.

Дакладную прычыну смерці ўсталюе экспертыза. Байда раней не судзіўся. Ён заявіў, што дзяўчынка сама папрасіла яго купіць ёй балон са звадкаваным газам, і што ён спрабаваў апрытоміць яе пасля страты прытомнасці. Школьніца не знаходзілася на прафілактычным уліку як цяжкі падлетак і раней да адказнасці не прыцягвалася.

У 2019 годзе Байда быў вылучаны ад «Адзінай Расіі» ў Чайкінскі сельскі савет і стаў дэпутатам. У 2024‑м ён зноў балатаваўся ад той жа партыі, але заняў апошняе месца па колькасці галасоў.