Дэпутат Дзярждумы РФ Мілонаў прызнаўся, што забіваў украінцаў

• 11.08.2026, 13:53

Ваенны злачынца ўразіў цынізмам выказванняў.

Дэпутат Дзярждумы РФ ад «Адзінай Расіі» Віталь Мілонаў заявіў, што забіваў людзей на расійска-ўкраінскай вайне. Пра гэта ён распавёў у інтэрв’ю блогеру Амірану Сардарову, піша «Медуза».

Сардараў спытаў у Мілонава, ці праўда, што ў яго ёсць ордэн Мужнасці, атрыманы на вайне. Дэпутат пацвердзіў, што ордэн яму далі за «баевыя дзеянні», але не стаў раскрываць падрабязнасцяў, бо прэзідэнцкія ўказы аб узнагароджанні «маюць закрыты характар». Пасля гэтага адбыўся такі дыялог:

Сардараў: Вы забівалі людзей?

Мілонаў: Так.

Сардараў: На СВА?

Мілонаў: Так. Я ж старшы наводчык. Старшы наводчык гарматы МТ-12 «Рапіра», якая знаходзіцца ў двух-трох кіламетрах ад лініі фронту, ад перадавой. <�…> Задача гарматы — знішчаць жывую сілу і тэхніку праціўніка.

Сардараў: А з гэтым не складана потым жыць?

Мілонаў: Не. Гэта твой доўг як вайскоўца. Вы думаеце, калі б я іх не забіў, яны прыйшлі б да нас і пілі б з намі гарбату? Не, вядома.

Віталь Мілонаў пайшоў на фронт добраахвотнікам у кастрычніку 2022 года і служыў у супрацьтанкавай артылерыйскай батарэі. У лютым 2023-га ён паведаміў, што тэрмін яго кантракту падышоў да канца, а яшчэ праз год распавядаў, што падчас баявых дзеянняў атрымаў раненне. У інтэрв’ю «Камсамольскай праўдзе» Мілонаў сцвярджаў, што яму давялося вярнуцца з вайны, паколькі дэпутатам забаранілі працяглае знаходжанне ў зоне СВА.

У Дзярждуме Мілонаў займае пасаду намесніка старшыні камітэта па абароне сям’і, па пытаннях бацькоўства, мацярынства і дзяцінства. На восеньскіх выбарах ён зноў будзе вылучаць сваю кандыдатуру — у Паўднёвай выбарчай акрузе Пецярбурга. На пачатку жніўня Мілонаў сярод іншых пецярбургскіх дэпутатаў па незразумелай прычыне змяніў імя ў сваіх сацсетках — цяпер яго акаўнты называюцца «Віталій Выбар Мільёнаў».