Сілавікі трэніраваліся пад Мінскам разганяць «масавыя беспарадкі»

• 11.08.2026, 15:12

Лукашысты дагэтуль баяцца паўтору пратэстаў.

Сілавікі трэніраваліся разганяць масавыя беспарадкі на палігоне вайсковай часці 3310 пад Мінскам, паведамілі ў МУС.

У ведамстве сцвярджаюць, што вучэнні праводзіліся планава. У трэніроўцы былі задзейнічаныя зводны атрад міліцыі Мінскай вобласці і ваеннаслужачыя ўнутраных войскаў.

Яны адпрацавалі «тактычныя прыёмы і алгарытмы дзеянняў пры спыненні масавых беспарадкаў у населеным пункце», паведамілі ў МУС.

Судзячы па апублікаваных фотаздымках, падчас вучэнняў сілавікі, у тым ліку, трэніраваліся выкарыстоўваць спецыяльныя сродкі і тэхніку.

Вучэнні прайшлі праз шэсць гадоў пасля масавых пратэстаў 2020 года, якія рэжым Лукашэнкі падаўляў з дапамогай АМОНу і ўнутраных войскаў. Таму не выключана, што за фармулёўкай пра «планавыя вучэнні» хаваецца і захоўваецца страх лукашыстаў перад магчымым паўторам масавых пратэстаў.