На дарогах Беларусі ўсталёўваюць «тэхаскія вароты»

• 11.08.2026, 15:22

Як рэагаваць вадзіцелям?

У Беларусі на дарогах з’явяцца «тэхаскія вароты». Для чаго яны патрэбныя, начальнік галіновай дарожнай лабараторыі Беларускага дарожнага навукова-даследчага інстытута «БелдорНИИ» Сяргей Кабак расказаў БелТА.

Спецыяліст патлумачыў, што на трасе М6 укараняюць новую сістэму абароны ад жывёл; падобная ўпершыню была рэалізавана раней на трасе М10. Праект уяўляе сабой абсталяваны наземны пераход для дзікіх жывёл з інфармаваннем вадзіцеляў.

- Вадзіцеляў папярэджваюць пра набліжэнне звера да праезнай часткі, - патлумачыў Кабак.

Так, калі жывёла побач з дарогай, спрацоўвае датчык руху і перадае сігнал на дарожны знак, які пачынае свяціцца. Яшчэ на падыходах да пераходу ўладкаваныя шумавыя палосы з буйнага шчэбеню, якія ствараюць дыскамфорт для капытоў жывёл, каб ім не хацелася пераскокваць праз гэтую паверхню.

Таксама на ўчастку ўсталявана асвятленне, якое выконвае дзве функцыі: падсвятляе мясцовасць і адпужвае жывёл ад уваходу ў асветленую прастору. У Беларусі гэтую канструкцыю эксплуатуюць ужо каля двух гадоў, пастаянна яе ўдасканальваючы.

- Мяркуецца, што ў найбліжэйшы час гэты досвед будзе распаўсюджаны на ўсю краіну, - адзначыў эксперт.

Аналагічную інфраструктуру ствараюць і на трасе М-6 Мінск - Гродна, у Валожынскім раёне. Акрамя таго, на ўчастку М-6 хочуць зрабіць так званыя «тэхаскія вароты» (па-іншаму «канадскі скатапрагон»). Выкарыстоўваецца спецыяльная пліта, якая стварае дыскамфорт для жывёлы, каб яна разгарнулася і пайшла назад. Таксама канцы сетак абсталююць спецыяльнымі аднабаковымі клапанамі, якія прадухіляюць выпадкі, калі жывёла даходзіць да канца агароджы і выходзіць на дарогу.

- Клапан дае магчымасць зверу сысці ў лес, але не зайсці адтуль на трасу, - адзначыў спецыяліст.