Студэнт у Бельгіі рыў каналізацыю і знайшоў скарб на мільёны еўра

• 16.08.2026, 8:43

Золата было схаванае на тэрыторыі былой броварні, у 30 км на паўночны захад ад Бруселя.

18-гадовы бельгійскі студэнт падчас пракладкі каналізацыі на месцы былой броварні натрапіў на незвычайную знаходку. Спачатку ён падумаў, што выкопаў звычайныя манеты наміналам у адзін еўра, аднак сярод іх аказаўся залаты злітак — і не адзін.

Пра гэта паведамляе The Guardian.

Спачатку знаходка не падалася студэнту чымсьці незвычайным. Паводле яго слоў, ён падумаў, што гэта манеты наміналам у адзін еўра.

«Спачатку я падумаў, што гэта манеты па 1 еўра. Таму мы пачалі іх выкапваць. Потым мы ўбачылі залаты злітак», — распавёў хлопец.

Урэшце высветлілася, што знойдзенае золата можа каштаваць каля 9 млн еўра.

Дзе быў схаваны скарб

Знаходку выявілі на тэрыторыі былой броварні, прыкладна за 30 км на паўночны захад ад Бруселя. Скарб складаўся з залатых манет і пранумараваных зліткаў. Іх знайшлі ў сумцы, замураванай у сцяне сутарэння пад вялікай вілай.

Дом напрыканцы XIX стагоддзя, яшчэ ў 1899 годзе, пабудавалі для ўладальніка бровара. Цяпер тэрыторыю рэканструюе арганізацыя сацыяльнага забеспячэння, і тут плануюць узвесці офісы і жыллё.

Золата перадалі паліцыі

Студэнт і яго калегі адразу паведамілі пра знаходку паліцыі і прадстаўнікам арганізацыі, якая вядзе рэканструкцыю. Клад ужо перавезлі ў бяспечнае месца ў Бруселі. Цяпер улады павінны правесці афіцыйнае расследаванне і вызначыць яго законнага ўладальніка.

У пракуратуры Усходняй Фландрыі адзначылі, што спачатку неабходна праверыць паходжанне золата — у прыватнасці, ці не было яно скрадзена або атрымана ў выніку злачыннай дзейнасці.

Акрамя таго, прэтэндаваць на клад могуць некалькі бакоў: будаўнічыя падрадчыкі, дабрачынная арганізацыя і магчымыя нашчадкі сям'і ўладальнікаў бровара.

Бельгійскае заканадаўства прадугледжвае ня менш як пяцігадовы тэрмін чакання, на працягу якога патэнцыйныя ўладальнікі могуць заявіць свае правы на знаходку.

Ці атрымае студэнт узнагароду

Сам студэнт прызнаў, што ён і яго калегі адразу зразумелі: такую знаходку трэба перадаць уладам.

«Калі б гэта было некалькі манет, магчыма, не», — сказаў ён.

У той жа час хлопец спадзяецца, што ў будучыні той, хто знайшоў клад, усё ж атрымае пэўную ўзнагароду.