«Давер рухнуў»: Z-блогер заявіў пра масавае бегства крымчан з паўвострава

• 16.08.2026, 13:56

Расчараванне акупацыйнай «уладай» дасягнула мяжы.

Расійскі Z-блогер Аляксандр Горны, які пераехаў у акупаваны Крым у 2014 годзе, шчыра распавёў пра сітуацыю на паўвостраве. Ён адзначыў абвал прарасійскіх настрояў сярод мясцовых жыхароў. Горны апублікаваў запіс у Facebook 15 жніўня, паведамляе «Дыялог.UA».

Паводле яго слоў, у Крыме абрынуўся давер і да Масквы, і да маскоўскіх стаўленікаў. Людзі зразумелі, што Расія кінула іх на волю лёсу.

«Ніякага адзінства крымчан няма, кожны сам за сябе. Нядрэнна сябе адчуваюць барыгі: гандлююць і палівам, і генератарамі ўздоўж трас, і накручваюць цэны на прадукты. Таму ўсе лозунгі пра ўсеагульнае адзінства крымчан — гэта хлусня, элемент прапаганды, які не мае ніякай рэальнай асновы. Сярод маіх шматлікіх знаёмых і падпісчыкаў давер да Аксёнава канчаткова падарваны, ён рухнуў, як і да федэральнага цэнтра. Гэта я чую практычна ў кожнай размове, чаго яшчэ месяц таму не было», — паведаміў Z-блогер.

Паводле ягоных дадзеных, на паўвостраве набірае абароты банкаўскі і харчовы крызіс, тавары прадаюцца значна даражэй, чым у РФ. Расіяне масава ўцякаюць з Крыма або рыхтуюцца да гэтага.

«Маркетплэйсы проста «ляглі» і не ўстаюць, асабліва ў Крыме. Людзі на паўвостраве засталіся без працы і даходаў, мікрафінансавыя арганізацыі «ў шакаладзе». Паліўны крызіс зноў нарастае, цэннік вырас, пачаліся сур'ёзныя перабоі, і людзям няма чым запраўляць нават генератар. Дзе захоўваць хранічна хворым лекі, калі халадзільнікі плывуць? Перспектыў паляпшэння сітуацыі ніякіх, гэта ўжо даходзіць да многіх. Некаторыя мае крымскія знаёмыя пачалі рыхтавацца да пераезду», — піша Горны.