На Беларусь насоўваецца шквал непагоды
- 17.08.2026, 19:35
Дажджы чакаюцца ўжо ў бліжэйшыя гадзіны.
Ужо ў бліжэйшыя гадзіны надвор’е ў Беларусі рэзка пагоршыцца. Усяму віной паўднёвы цыклон, які рухаецца з захаду Украіны праз нашу краіну ў бок Ленінградскай вобласці Расіі.
Ён прынясе з сабой ліўні, навальніцы і парывісты вецер, перадае Белгідрамет.
Пік непагоды прыйдзецца на 18 жніўня. Моцныя дажджы пройдуць ва многіх раёнах краіны, а ў ноч на 19-е інтэнсіўныя ападкі мясцамі захаваюцца на поўначы.
Дадасць праблем і вецер. Яго парывы ў аўторак і сераду могуць дасягаць 15–20 м/с.
Больш падрабязную карціну на 18 жніўня дае тэлеграм-канал @nadvorie. Паводле ягоных даных, ужо пасля поўначы моцныя і працяглыя дажджы пачнуцца ў Брэсцкай, а затым і ў Гродзенскай вобласці.
Да раніцы ападкі дабяруцца да Мінска. Прычым некаторыя мадэлі надвор’я дапускаюць магутны дождж непасрэдна над сталіцай. За тры гадзіны можа выпасці 20–25 мм ападкаў.
Да поўдня непагода накрые ўжо Віцебскую вобласць. А ў другой палове дня Магілёў і Гомель апынуцца ў зоне халоднага фронту. Менавіта на ўсходзе краіны можа сканцэнтравацца асноўная навальнічная актыўнасць.
Пра складаную абстаноўку на ўсходзе і паўднёва-ўсходзе Беларусі таксама паведамляе тэлеграм-канал «Метеовайб».
У гэтай частцы краіны ёсць верагоднасць фармавання суперячэйкавых навальніц з градам і шквалістым ветрам да 15–20 м/с, а месцамі парывы могуць дасягаць 24 м/с. Акрамя таго, сіноптыкі не выключаюць утварэння лакальных тарнада.
Пры гэтым інтэнсіўныя дажджы чакаюцца не толькі на Гомельшчыне і Магілёўшчыне. У некаторых раёнах Беларусі за 12 гадзін можа выпасці больш за 50 мм ападкаў. Гэта можа прывесці да лакальных падтопленняў.
На фоне непагоды на большай частцы краіны будзе даволі прахалодна. Уначы 18 жніўня чакаецца +9…+14°C, толькі на поўдні – да +17°C.
Удзень паветра прагрэецца ўсяго да +13…+20°C. Значна цяплей будзе ў паўднёва-ўсходняй палове Беларусі, дзе слупкі тэрмометраў могуць падняцца да +21…+28°C.
У Мінску ўначы прагназуюць +12…+14°C, удзень – толькі +15…+17°C.