У Мінску прадаюць кватэру легендарнага лётчыка

• 18.08.2026, 15:48

Як яна выглядае і колькі каштуе?

На рынку сталічнай нерухомасці з'явіўся далёка не шараговы варыянт. На продаж выставілі кватэру, у якой жыў лётчык-штурмавік, генерал-лейтэнант авіяцыі і двойчы Герой Савецкага Саюза Леанід Бяда.

За жыллё з гісторыяй, размешчанае ў цэнтры Мінска проста насупраць парка Горкага, просяць амаль сямізначную суму, піша Realt.

Леанід Бяда жыў у дзевяціпавярхоўцы на вуліцы Янкі Купалы, 7. Дом узвялі яшчэ ў 1969 годзе, і па савецкіх мерках ён лічыўся элітным.

Кватэры тут атрымлівалі вядомыя пісьменнікі, дзяржаўныя дзеячы, вайскоўцы і ветэраны. Пра многіх знакамітых жыхароў сёння нагадваюць мемарыяльныя дошкі на фасадзе.

Кватэра легендарнага лётчыка, якую цяпер выставілі на продаж, знаходзіцца на пятым паверсе. Плошча жылля нямаленькая — 101,3 м².

Першапачаткова ў кватэры было чатыры пакоі, дзве зашклёныя лоджыі, балкон і два санвузлы. Пазней жыллё перапланавалі: пакояў засталося тры, а каля акна ў канцы калідора з'явілася сталовая.

Апартаменты прадаюцца з гатовай аздобай, мэбляй і тэхнікай. На падлозе — натуральная дошка і плітка, устаноўлены італьянскія дзверы і нямецкія вокны.

На кухні застаецца гарнітур са ўбудаванай тэхнікай, а ў спальнях — мэбля. Таксама ў кватэры ёсць два сучасныя санвузлы і кандыцыянер.

Кошт жылля спыніўся літаральна ў кроку ад 1 млн рублёў. За яго просяць 999 000 рублёў. Паводле бягучага курсу Нацбанка гэта каля $334 000.

Такім чынам, адзін «квадрат» абыдзецца пакупніку прыблізна ў $3300.