Больш за 70% АЗС у Расіі засталіся без бензіну
- 18.08.2026, 16:48
Новая хваля дэфіцыту.
Расію накрыла другой хвалёй паліўнага крызісу: па стане на 16 жніўня бензін або дызель былі даступныя толькі на 28,1% заправаў па краіне, тады як тыднем раней паказчык складаў 41%. Пра гэта сведчаць дадзеныя прыкладання «ГдеБЕНЗ», на якія звярнулі ўвагу «Известия». За апошнія сем дзён даступнасць паліва знізілася ў Валгаградскай, Чалябінскай, Арэнбургскай, Варонежскай, Самарскай, Пензенскай, Саратаўскай, Ліпецкай і Растоўскай абласцях, а таксама ў Татарстане.
Існаванне праблем на АЗС пацвердзілі ўлады прынамсі васьмі рэгіёнаў, у тым ліку Краснодарскага краю, Калужскай і Ніжагародскай абласцей. Яшчэ як мінімум жыхары 13 рэгіёнаў паведамлялі пра дэфіцыт паліва ў сацсетках. Сярод іх — Масква, Падмаскоўе, Іркуцкая, Архангельская і Тамская вобласці, Забайкальскі і Стаўрапольскі краі, Якуція і Адыгея. Карэспандэнты «Известий» 17 жніўня праверылі 21 запраўку ў Маскве і Падмаскоўі. АІ-92 апынуўся ў продажы толькі на сямі з іх, АІ-95 — на шасці, а АІ-98 — на пяці. «Новая хваля дэфіцыту ўзнікла з-за працяглых атак і пазапланавых рамонтаў на нафтаперапрацоўчых заводах», — растлумачыў вядучы аналітык Фонду нацыянальнай энергетычнай бяспекі Ігар Юшкоў.
Да гэтага ў S&P Global падлічвалі, што са студзеня па ліпень Збройныя сілы Украіны (ЗСУ) з дапамогай удараў беспілотнікамі вывелі з ладу не менш як 26 нафтаперапрацоўчых заводаў (НПЗ) у Расіі. Сем з іх не аднавілі вытворчасць, а ў жніўні спынілі працу яшчэ чатыры прадпрыемствы. У выніку нафтаперапрацоўка ў Расіі, паводле ацэнак EA Analytics, падала да 3,6 млн барэляў у суткі — найнізкага ўзроўню з мая 2002 года, але ў жніўні вырасла да 4 млн барэляў. Аднак, як адзначалі аналітыкі Rystad, гэта на 30% ніжэй за сезонную норму.
На дадзены момант, паводле крыніц Reuters, расійскія ўлады звозяць бензін з рэгіёнаў у Маскву. Пры гэтым суразмоўцы «Коммерсанта» на рынку паліва адзначылі, што да пачатку верасня крызіс можа абвастрыцца, паколькі адзін з двух НПЗ у Беларусі, з якога ідуць пастаўкі ў Расію, пойдзе на рамонт. Таксама планавыя рамонты запланаваныя на некалькіх буйных расійскіх заводах.