Галоўчанка ў стылі Пракаповіча паспрабаваў супакоіць беларусаў

• 18.08.2026, 21:05

Кіраўнік Нацбанка назваў аслабленне беларускага рубля ў дачыненні да долара «абсалютна спакойнай сітуацыяй».

Сітуацыя на валютным рынку «абсалютна спакойная». Так пракаментаваў аслабленне беларускага рубля да долара кіраўнік Нацбанка Раман Галоўчанка у эфіры дзяржаўнага тэлеканала «Першы інфармацыйны».

— Сітуацыя абсалютна спакойная, рухі курсу ідуць у межах нашых калідораў. Калі казаць пра нязначнае аслабленне беларускага рубля да долара, дык яно найперш звязана з аслабленнем расійскага рубля адносна долара. У нас фарміраванне курсу адбываецца паводле формулы з улікам нашай валютнай карзіны. Адпаведна, мы крыху аслабелі адносна амерыканскай валюты. Але зноў-такі — гэта ў межах нашых калідораў, — паведаміў Галоўчанка.

Ён дадаў, што ў мінулыя гады ў жніўні насельніцтва (перш за ўсё юрыдычныя асобы) выступала пакупніком валюты, але цяпер «і фізічныя, і юрыдычныя асобы валюту прадаюць», што «таксама аказвае пэўную падтрымку курсу беларускага рубля».

— Таму ўсё спакойна і стабільна, — запэўніў кіраўнік Нацбанка.

Нагадаем, да заканчэння мінулага тыдня абменны курс долара ЗША на беларускім валютным рынку шчыльна наблізіўся да псіхалагічнай мяжы ў 3 рублі.

Заўважым, выказванні Галоўчанкі нагадваюць заявы і «прагнозы» экс-кіраўніка Нацбанка Беларусі Пятра Пракаповіча. У сакавіку 2011 года Пракаповіч заяўляў: «Пакуль я з’яўляюся старшынём праўлення Нацбанка, ніякай аднаразовай імгненнай дэвальвацыі ніколі не будзе» (нават на 5%). У рэчаіснасці ўжо ў маі 2011 года беларускі рубель быў імгненна дэвальваваны больш чым на 56%.