ABC: Нават прыхільнікі Пуціна ў Расіі пачынаюць ставіць пад сумнеў вайну ва Украіне
- 2.08.2026, 22:15
Сярод расіян растуць трывога і расчараванне.
Доўгі час жыхары найбуйнейшых і найбольш багатых гарадоў Расіі былі абароненыя ад наступстваў паўнамасштабнага ўварвання іх краіны ва Украіну, якое працягваецца ўжо пяты год, піша ABC.
Аднак, як адзначае выданне, апошнім часам іх жыццё ўсё больш парушаецца, і небяспека, якую ўяўляюць сабой гудзячыя над галовамі дроны, – гэта толькі частка праблемы.
«Цэны на многія тавары рэзка выраслі. Не хапае паліва. Падарожнічаць – нават унутры краіны – можа быць складана. Сярод расіян растуць трывога і расчараванне», – гаворыцца ў артыкуле.
Людзі, якія жывуць ва ўмовах аўтакратыі прэзідэнта Расіі Уладзіміра Пуціна, ужо адчулі на сабе наступствы заходніх санкцый і ўзмацнення крэмлёўскай цэнзуры падчас вайны.
Акрамя таго, ім таксама складана пазбегнуць мабілізацыйных кампаній, накіраваных на папаўненне колькасці войскаў, якія нясуць велізарныя страты на полі бою, асабліва ў рэгіёнах.
Выданне адзначае, што з таго часу, як Украіна распрацавала беспілотнікі, здольныя паражаць мэты ў глыбіні тэрыторыі Расіі, сітуацыя стала значна больш сур'ёзнай і ў буйных гарадах.
«Дайшло да таго, што людзі сапраўды пакутуюць. Я ведаю шмат маладых людзей, якія цяпер прымаюць антыдэпрэсанты. Ці яны пачалі злоўжываць алкаголем. Стала так цяжка спраўляцца з усёй гэтай сітуацыяй», – расказала расіянка Святлана, якой за 50.
Нафтаперапрацоўчыя заводы былі пашкоджаныя або знішчаныя, што прывяло да доўгіх чаргаў на запраўках.
Апошнім часам аб’ектамі атак сталі склады буйной карпарацыі «Wildberries», якую часта называюць расійскім аналагам Amazon. Выданне прыводзіць даныя, што на яе долю прыпадае прыблізна 10% усяго рознічнага гандлю ў краіне.
«Малыя прадпрыемствы, што карыстаюцца гэтай платформай, пазбавіліся сваіх каштоўных запасаў. Для спажыўцоў зручнасць хуткай дастаўкі тавараў таксама знікла», – дадаецца ў артыкуле.
Святлане гэта надакучыла, і яна лічыць, што «настаў час змяніць уладу». На думку выдання, ёсць падставы меркаваць, што яна не адзіная такая.
Выданне паведаміла, што, паводле даных «Левада-Цэнтра» – незалежнай арганізацыі, якая праводзіць апытанні грамадскай думкі і якую Крэмль прызнаў «замежным агентам», – расіяне ўсё больш непакояцца аб стане дзяржаўных фінансаў.
Таксама былі абнародаваныя даныя, згодна з якімі рэйтынг адабрэння Пуціна ўпаў да найнізкага ўзроўню з пачатку паўнамасштабнага ўварвання ва Украіну.
Тым часам апытанне 1 500 рэспандэнтаў, праведзенае на пачатку гэтага месяца расійскім Фондам грамадскай думкі, паказала, што ўзровень трывогі сярод насельніцтва краіны ў гэтым годзе расце і цяпер з’яўляецца дамінуючай эмоцыяй ва многіх супольнасцях.
«У чым сэнс гэтай вайны? Менавіта гэтае пытанне расіяне задаюць сабе ўсё часцей», – распавёў старшы навуковы супрацоўнік цэнтра NEST Джон Лауг.
Паводле выдання, дзяржаўныя тэлеканалы і газеты краіны асцярожна падаюць навіны пра рост цэн і ўзмацненне нязручнасцяў.
«На дзяржаўным тэлебачанні, магчыма, і прызнаюць, што жыццё ў Расіі стала цяжэйшым, але сцвярджаюць, што ў іншых краінах сітуацыя значна горшая. Менавіта гэта, часткова, з’яўляецца прычынай таго, што пакуль не было шмат публічных праяў гневу супраць Пуціна», – заявіў у інтэрв’ю выданню дацэнт кафедры эканомікі Расіі, Усходняй Еўропы і Еўразіі Аксфардскага ўніверсітэта Майкл Рохліц.
Жыхарка Санкт-Пецярбурга Кацярына расказала ABC, што за апошнія 12 месяцаў заўважыла змены ў жыцці грамадства:
«Цэны выраслі. Тарыфы на камунальныя паслугі істотна павысіліся. Усе мае сябры страцілі працу і пакінулі горад. Некаторым удалося выехаць з краіны. Усе стаміліся, нават тыя, хто падтрымлівае вайну, стаміліся».
У той жа час выданне прызнае, што рост здольнасці Украіны наносіць удары па мэтах за мяжой не абышоўся без страт на тэрыторыі краіны.
У прыватнасці, Крэмль узмацніў паветраныя бамбаванні ўкраінскіх гарадоў і нанёс удары па грамадзянскай інфраструктуры. Гэта прывяло да таго, што запасы перахопных ракет у Кіеве іссякаюць, а колькасць загінулых расце.
Аднак, паводле слоў спадара Лауга, пасля некалькіх гадоў баявых дзеянняў паспяховыя ўдары Украіны ўплываюць на псіхалагічны стан расіян, якія жывуць у найбуйнейшых гарадах краіны.
«Большасць маіх сяброў больш не могуць сабе дазволіць хадзіць у рэстараны, таму цяпер мы сустракаемся ў нас дома. Мы сядзім там і абмяркоўваем сітуацыю. Стараемся падбадзёрыць адно аднаго. Некаторыя мае знаёмыя раней падтрымлівалі вайну і палітыку прэзідэнта. Цяпер, калі яны і не змянілі сваю думку на 180 градусаў, то на 90 – дакладна», – расказала Святлана.