У Маскве знайшлі мёртвым генерал-маёра ФСБ
- 21.08.2026, 11:53
(Абноўлена) Усплылі цікавыя факты з яго біяграфіі.
У Расіі працягваецца «мор» сярод высокапастаўленых сілавікоў. У Маскве 20 жніўня знайшлі мёртвым генерал-маёра ФСБ у адстаўцы Ігара Лапцева, ён нібыта здзейсніў самагубства.
Ён быў кіраўніком кампаніі, якая пастаўляе праграмнае забеспячэнне і абсталяванне для расійскіх сілавых структур. Пра гэта піша «Obozrevatel» са спасылкай на расійскія СМІ.
Што вядома
Паводле паведамленняў расійскіх СМІ, цела 83-гадовага Ігара Лапцева, генерал-маёра ФСБ у адстаўцы, знайшлі ў яго кватэры на вуліцы Верхняй Краснасельскай напярэдадні, 20 жніўня.
«Ён звёў рахункі з жыццём», — сцвярджаюць прапагандысты з «Маскоўскага камсамольца», якія першымі паведамілі пра смерць былога высокапастаўленага сілавіка.
Прапагандысты не забыліся згадаць, што Лапцеў удзельнічаў у агрэсіўнай вайне СССР з Афганістанам, затым доўгі час служыў у ФСБ, дзе «займаўся пытаннямі інфармацыйнай бяспекі».
Паспеў Лапцеў папрацаваць у падатковай паліцыі і нават займаў пасаду намесніка міністра РФ па падатках і зборах.
З 1998 года ўзначальваў савет дырэктараў кампаніі «Інфармтэхніка і Сувязь», якая пазней увайшла ў групу кампаній «Інфармтэхніка».
«Маскоўскі камсамолец» пастесняўся паведаміць, чым займалася кампанія Лапцева. За яго гэта зрабіла апазіцыйнае расійскае выданне «SOTA».
«Кампанія вырабляе камп'ютарнае праграмнае забеспячэнне і абсталяванне. Сярод найбуйнейшых яе кантрагентаў у адкрытых базах пералічаны Мінабароны, МУС, тэлефонная станцыя Санкт-Пецярбурга і інш.», — адзначана ў паведамленні.
З пачатку вайны ва Украіне адбылася серыя самагубстваў генералаў сілавых ведамстваў РФ. У маі ў Маскве памёр 87-гадовы генерал-палкоўнік Станіслаў Пятроў — былы начальнік войскаў радыяцыйнай, хімічнай і біялагічнай абароны. Яго цела знайшлі ў кватэры ў Доме на набярэжнай. Паводле звестак РБК, Пятроў удзельнічаў у ліквідацыі наступстваў аварыі на Чарнобыльскай АЭС і цяжка хварэў, а «Газета.Ru» паведамляла пра магчымую версію самагубства.
У лютым 2023-га ў Падмаскоўі быў знойдзены мёртвым 72-гадовы генерал-маёр паліцыі Уладзімір Макараў. Ён займаў пасаду намесніка начальніка Галоўнага ўпраўлення МУС па барацьбе з экстрэмізмам і незадоўга да смерці быў вызвалены ад яе з прычыны ўзросту. ТАСС паведамляў, што Макараў скончыў жыццё самагубствам.
У ліпені 2022-га ў Маскве загінуў генерал-маёр ФСБ у адстаўцы Яўген Лабачоў. Яго цела знайшлі на лесвічнай пляцоўцы дома на Качалінскай вуліцы. Лабачову было 76 гадоў. Паводле даных ТАСС са спасылкай на праваахоўныя органы, прычынай смерці стаў суіцыд.
За месяц да гэтага ў Маскве быў знойдзены мёртвым 90-гадовы генерал-маёр СВР у адстаўцы Леў Соцкаў. РБК паведамляў, што цела Соцкава знайшлі ў яго кватэры на вуліцы Наватараў. Побач знаходзіўся нагародны пісталет.