Памёр былы прэм'ер Эстоніі Сіім Каллас

• 22.08.2026, 15:47

Ён таксама з'яўляецца бацькам кіраўніцы еўрапейскай дыпламатыі Каі Каллас.

На 78-м годзе жыцця памёр бацька кіраўніцы еўрапейскай дыпламатыі Каі Каллас, былы прэм'ер-міністр Эстоніі Сіім Каллас. Пра гэта яго дачка паведаміла ў Instagram.

«З жалем вымушана паведаміць, што мой дарагі бацька Сіім Каллас памёр сёння ўвечары», — напісала Каллас.

Сіім Каллас нарадзіўся 2 кастрычніка 1948 года ў Таліне. У 1972 годзе скончыў Тартускі ўніверсітэт па спецыяльнасці «фінансы і крэдыт», там жа вучыўся ў аспірантуры з 1973 па 1975 год, абараніў кандыдацкую дысертацыю. У 1969–1972 гадах праходзіў тэрміновую службу ў войсках сувязі.

З 1989 па 1991 год Каллас быў народным дэпутатам Вярхоўнага Савета СССР. У 1991–1995 гадах узначальваў Банк Эстоніі. У 1994 годзе Каллас заснаваў Партыю рэформ. Па выніках выбараў 1995 года партыя ўвайшла ў кіруючую кааліцыю, а Каллас заняў пасаду міністра замежных спраў (1995–1996).

У 1999 годзе ён узначаліў Міністэрства фінансаў Эстоніі. Пасля адстаўкі Марта Лаара ў 2002 годзе Каллас стаў прэм'ер-міністрам Эстоніі, аднак пакінуў гэтую пасаду на наступны год.

У 2004 годзе Еўрапарламент прызначыў Каласа камісарам па адміністраванні, аўдыце і барацьбе з махлярствам. У 2010 годзе ён перайшоў на пасаду камісара ЕС па транспарце. З 2004 па 2014 год быў віцэ-прэзідэнтам Еўракамісіі, у 2019–2024 гадах — дэпутатам эстонскага парламента.

Акрамя дачкі Каі ў Каласа застаўся сын Юло.