Беларуска ператварыла апору ЛЭП у твор мастацтва

• 24.08.2026, 16:03

На слупе з’явіўся беларускі нацыянальны арнамент.

Карыстальніца Threads lipunyusha паказала, як яна ўпрыгожыла апору лініі электраперадачы каля свайго дома.

«Мяне страшэнна нервавала гэтая апора каля брамы, таму вырашыла яе ўпрыгожыць, — піша яна, каментуючы відэа, якое апублікавала ў сацыяльнай сетцы. — Першы кадр — не зусім «да», я спачатку здзерла шмат аб’яў, а ўжо потым дадумалася зняць відэа. Як вам?»

Аўтарка відэа падкрэсліла, што намаляваныя ёю элементы арнаменту не перакрылі лічбы і літары, якія былі нанесеныя на слуп электрыкамі.

«Слуп раптам выявіў у сабе беларускія карані», — пракаментаваў відэа адзін з карыстальнікаў сацыяльнай сеткі.