Зорка «Гульні тронаў» далучыўся да серыяла «Гары Потэр»

• 24.08.2026, 22:17

Кіт Харынгтан згадзіўся замяніць акцёра Нікаласа Холта.

Зорка серыяла «Гульня тронаў», брытанскі акцёр Кіт Харынгтан далучыўся да серыяла «Гары Потэр» ад HBO — у другім сезоне ён згуляе пісьменніка і выкладчыка Хогвартса Златапуста Лаканса. Пра гэта піша Deadline.

Харынгтан заменіць Нікаласа Холта, які першапачаткова быў зацверджаны на гэтую ролю, але быў вымушаны ад яе адмовіцца праз неабходнасць сумяшчаць здымкі ў серыяле з працай над новым праектам пра Супермэна.

У серыяле «Гары Потэр» акцёр увасобіць персанажа, якога ён ужо агучваў у праекце Harry Potter: The Full-Cast Audio Editions — серыі паўнавартасных аўдыяспектакляў паводле ўсіх кніг пра хлопчыка-чараўніка аўтарства Джоан Роўлінг. У азвучанні таксама ўдзельнічалі і іншыя вядомыя акцёры: напрыклад, дырэктара Хогвартса Альбуса Дамблдора агучыў брытанскі акцёр Х’ю Лоры, а ліхадзея лорда Валдэморта — Мэцью Макфэдыен.

Студыя HBO падоўжыла серыял «Гары Потэр» на другі сезон яшчэ да выхаду першага. Здымкі «Пакоя Таямніц» пачнуцца восенню 2026 года, пісала выданне Variety. Стваральнікі серыяла плануюць адаптаваць усе сем кніг Джоан Роўлінг пра Гары Потэра ў выглядзе сямі сезонаў цягам дзесяці гадоў. Кожная кніга атрымае свой сезон.

У траўні 2025 года Warner Bros. Discovery назвала акцёраў, якія выканаюць галоўныя ролі ў серыяле паводле кніг Роўлінг: Дамінік Маклахлін згуляе Гары Потэра, Арабэла Стэнтан — Герміёну Грэнджэр, а Аластар Стоўт — Рона Уізлі.

Тызер новага серыяла пра Гары Потэра ад тэлекампаніі HBO, апублікаваны 25 сакавіка, паглядзелі больш за 277 млн разоў за 48 гадзін — гэта зрабіла ролік найбольш прагляданым трэйлерам за ўсю гісторыю кампаніі, паведамляецца на афіцыйным сайце Warner Bros. Discovery.