Трамп адмяніў запланаваныя ўдары па Іране

• 3.08.2026, 9:40

Прэзідэнт ЗША зноў заявіў пра перамовы.

Прэзідэнт ЗША Дональд Трамп паведаміў, што перамовы з Іранам адновяцца ў панядзелак — неўзабаве пасля таго, як ён, паводле ўласных слоў, адмяніў «маштабнае нападзенне» на гэтую краіну.

Пра гэта паведамляе CNN.

Аднаўленне перамоваў запланавана на другую палову дня 3 жніўня.

«Яны ведалі пра маштабы атакі, бо бачылі, як яна рыхтавалася. Цяпер мы вядзём з імі перамовы. Яны пачнуцца заўтра пасля абеду, і паглядзім, што з гэтага выйдзе», — заявіў Трамп журналістам на борце самалёта Air Force One у нядзелю, вярнуўшыся пасля выходных, праведзеных у сваім гольф-клубе ў Бедмінстэры, штат Нью-Джэрсі.

Паводле слоў амерыканскага лідара, з просьбай адмяніць запланаваны ўдар да яго звярнуліся як рэгіянальныя саюзнікі — Саудаўская Арабія, Аб’яднаныя Арабскія Эміраты і Катар, — так і сам Іран.

«Мы ўжо поўнасцю гатовыя да дзеянняў, але калі саюзнікі папрасілі адмяніць атаку, мы, так бы мовіць, адказалі: „Ну, паглядзім“. А яны пра гэта просяць таму, што лічаць, нібыта ёсць пагадненне», — патлумачыў Трамп.

«Ёсць пагадненне па Армузскім праліве, а потым будзе пагадненне па ядзернай праграме, або, як вы гэта называеце, дэнуклеарызацыі Ірана. Я называю гэта дэнуклеарызацыяй Ірана», — дадаў прэзідэнт.

Як паведаміла ў нядзелю дзяржаўнае інфармацыйнае агенцтва Саудаўскай Арабіі, спадчынны прынц каралеўства Мухамед бін Салман правёў тэлефонную размову з Трампам, падчас якой настойваў на дэскалацыі канфлікту. Раней крыніцы ў размове з CNN удакладнялі, што спадчынны прынц выказаў занепакоенасць планамі ўдару па Іране.

На пытанне пра тое, ці маглі б удары быць скіраваныя на аб’екты энергетычнай інфраструктуры краіны, Трамп адказваць адмовіўся. Пры гэтым у суботнім допісе ў Truth Social ён ізноў падкрэсліў, што Злучаныя Штаты застаюцца «наўчаку і гатовыя да дзеянняў» супраць Ірана.