АПЕК+ адмяняе добраахвотныя абмежаванні

• 3.08.2026, 10:31

Здабыча нафты будзе павялічана.

Альянс з сямі краін АПЕК+, у які ўваходзяць Саудаўская Аравія, Расія, Ірак, Кувейт, Казахстан, Алжыр і Аман, у нядзелю, 2 жніўня, прыняў рашэнне павялічыць квоты на здабычу нафты на верасень на 188 000 барэляў у суткі.

Пра гэта гаворыцца ў іх прэс-рэлізе. Такім чынам «сямёрка» завяршыла вяртанне на рынак аб'ёмаў, раней скарачаных у межах другога этапу добраахвотных абмежаванняў (у агульнай складанасці на 1,65 млн барэляў у суткі). Першы этап — скарачэнне на 2,2 млн барэляў у суткі — быў згорнуты ў верасні 2025 года.

З 2023 года краіны свядома стрымлівалі здабычу для падтрымання цэн на нафту; цяпер ад гэтай палітыкі канчаткова адмовіліся, і пачынаецца падрыхтоўка да перамоваў аб квотах на 2027 год з удзелам усёй групы, а не толькі «сямёркі».

«АПЕК+ завяршыла скасаванне добраахвотных скарачэнняў здабычы. Наступнай задачай стане кіраванне залішняй прапановай, якая можа ўзнікнуць па меры нармалізацыі экспартных патокаў», — цытуе CNBC словы аналітыка Rystad Energy Хорхе Леона.

«Завяршыўшы кампанію па аднаўленні здабычы, АПЕК+ не мае асаблівых стымулаў спяшацца з далейшымі зменамі ў пастаўках. Наш базавы сцэнар прадугледжвае паўзу ў чацвёртым квартале, пакуль група будзе рыхтавацца да перамоваў аб квотах на 2027 год», — сказаў Леон.

Нягледзячы на фактычную адмову ад квот, краіны Персідскага заліва, якія ўваходзяць у АПЕК+, пакуль не могуць адпаведным чынам павялічыць здабычу (у чэрвені яна і ўвогуле ўпала да ўзроўняў канца 1980-х), бо пасля пачатку вайны Іран перакрыў Армузскі праліў, праз які на сусветны рынак паступала каля 20 млн барэляў нафты і нафтапрадуктаў у суткі з Персідскага заліва. Расія таксама істотна адстае ад сваёй квоты пасля ўкраінскіх удараў па НПЗ.

Раней паведамлялася, што 6 ліпеня 2026 года сусветныя цэны на нафту трохі знізіліся пасля таго, як краіны АПЕК+ дамовіліся з жніўня павялічыць мэтавыя аб'ёмы здабычы.