МЗС РФ агучыла абсурдную версію выбуху ў маскоўскім рэстаране

• 3.08.2026, 13:25

Нібыта мэтай удару былі італьянцы.

МЗС Расіі ўпершыню афіцыйна пракаментавала выбух у маскоўскім рэстаране Balzi Rossi, у выніку якога загінулі пяць чалавек і яшчэ 19 атрымалі раненні.

Як гаворыцца ў заяве пасольства РФ у Італіі, расійскі бок сцвярджае, што мэтай «кіеўскіх тэрарыстаў» была спроба запалохаць грамадзян Італіі, якія працуюць у Расіі.

«Відавочна, што, плануючы тэракт у адным з найлепшых італьянскіх рэстаранаў Масквы, кiеўскiя тэрарысты хацелі прыпалохаць італьянцаў, якія працуюць у Расіі, паказаць ім, што яны таксама пад прыцэлам і могуць у любы момант стаць наступнай ахвярай нягоднікаў», — гаворыцца ў заяве.

У пасольстве таксама заявілі, што «толькі дзякуючы пільнасці і самаадданай вернасці свайму прафесійнаму абавязку супрацоўніка расійскай службы бяспекі не пацярпелі шэф-кухар з Неапаля К. Альф'еры і члены яго каманды».

Акрамя таго, у дыпмісіі заявілі, што выбух у рэстаране Balzi Rossi, а таксама іншыя тэракты ў Расіі, Манака і «іншых месцах» нібыта сведчаць пра тое, што «украінская тэрарыстычная зараза ўжо пачынае распаўсюджвацца па Еўропе і па Італіі ў прыватнасці».

У той жа час незалежныя журналісты і расійскія Z-блогеры вылучаюць іншую версію таго, што адбылося. Паводле іх дадзеных, 1 жніўня рэстаран быў закрыты для прыватнага мерапрыемства, дзе адзначалі 55-годдзе. Найбольш верагодным імяніннікам яны называюць галоўнакамандуючага Паветрана-касмічных сіл РФ генерала Аляксандра Чайко, якому 27 ліпеня споўнілася 55 гадоў.

Паводле наяўнай інфармацыі, сам Чайко не пацярпеў, аднак, як сцвярджаецца, раненні маглі атрымаць яго дачка і зяць.

У 2022 годзе Аляксандр Чайко камандаваў наступам расійскіх войскаў на Кіеў і знаходзіцца пад санкцыямі Еўрапейскага саюза ў сувязі з меркаванай датычнасцю да ваенных злачынстваў у Бучы.